Қашқадарё вилоятининг Косон туманидаги боғчада 2,5 ёшли қиз вафот этгани ҳақида хабар берилганди. Ҳолат юзасидан жиноий иш очилди.
Бош прокуратуранинг хабар беришича, Косон туманида мактабгача таълим тарбияланувчиси вафот этгани ҳолати юзасидан Жиноят кодексининг 116-моддаси (касб юзасидан ўз вазифаларини лозим даражада бажармаслик) билан жиноят иши қўзғатилди.
Барча зарур тергов ҳаракатлари ўтказилганидан сўнг иш бўйича қонуний тўхтамга келинади.
Қизалоқнинг ўлим сабабини аниқлаш мақсадида суд-тиббий экспертизаси тайинланган. Текшириш ҳаракатлари ҳар томонлама, тўлиқ ва холисона ўтказилиши ва натижаси бўйича қонуний қарор қабул қилиниши таъминланади.
2,5 ёшли Зарина Иззатиллаевани эрталаб уйидан боғча эгаси Лола Ҳақназарова олиб кетган. Кўп ўтмай унинг яқинларига қизалоқнинг тоби бўлмай қолгани ҳақида хабар берилган.
“Отаси Россияда эди. Онаси билан поликлиникага бордик. Шифокорлар болада ҳаёт нишони йўқ эди дейишди ва у экспертизага олиб кетилганини айтишди. Уйга бориб кутиб ўтирдик. Кейин хабар бўлгач, экспертизадан мурдасини олиб келдик. Бизга бола машинада қолиб, димланиб ўлган дейишди. Бизни ҳозирча ҳеч ким ҳеч қаерга чақиргани йўқ”, деган қизалоқнинг бувиси.
Унинг қўшимча қилишича, боғча раҳбари Лола Ҳақназарованинг ўзи ҳар куни Spark машинасида уйдан боғчага, боғчадан уйга ташиган. Қизнинг бувисига кўра, ўша пайтда машинада 7-8 нафар бола бўлган.
Бухоро вилоятидаги хусусий боғчаларнинг бирида 3 ёшли бола ток уришидан вафот этган эди. Шунингдек, март ойида ҳам Бухоро туманидаги оилавий нодавлат мактабгача таълим ташкилотида 2023 йилда туғилган бола ток уриши оқибатида вафот этган.
Изоҳ (0)