Qashqadaryo viloyatining Koson tumanidagi bog‘chada 2,5 yoshli qiz vafot etganligi yuzasidan tergovga qadar tekshiruv harakatlari olib borilmoqda. Bu haqda Bosh prokuratura matbuot xizmati xabar berdi.
Maʼlum qilinishicha, marhuma qizning o‘lim sababini aniqlash maqsadida sud-tibbiy ekspertizasi tayinlangan.
Tekshirish harakatlari har tomonlama, to‘liq va xolisona o‘tkazilishi va natijasi bo‘yicha qonuniy qaror qabul qilinishi taʼminlanadi, deyiladi BP xabarida.
Kun.uz nashri Ushoqtepa mahallasidagi xususiy bog‘chada 20-iyun kuni 2,5 yoshli qizaloq vafot etgani bo‘yicha xabar bergandi. Qayd etilishicha, 2,5 yoshli Zarina Izzatillayevani ertalab uyidan bog‘cha egasi Lola Haqnazarova olib ketgan. Ko‘p o‘tmay uning yaqinlariga qizaloqning tobi bo‘lmay qolgani haqida xabar berilgan.
“Otasi Rossiyada edi. Onasi bilan poliklinikaga bordik. Shifokorlar bolada hayot nishoni yo‘q edi deyishdi va u ekspertizaga olib ketilganini aytishdi. Uyga borib kutib o‘tirdik. Keyin xabar bo‘lgach ekspertizadan murdasini olib keldik. Bizga bola mashinada qolib, dimlanib o‘lgan deyishdi. Bizni hozircha hech kim hech qayerga chaqirgani yo‘q”, degan qizaloqning buvisi.
Uning qo‘shimcha qilishicha, bog‘cha rahbari Lola Haqnazarovaning o‘zi har kuni Spark mashinasida uydan bog‘chaga, bog‘chadan uyga tashigan. Qizning buvisiga ko‘ra, o‘sha paytda mashinada 7-8 nafar bola bo‘lgan.
Buxoro viloyatidagi xususiy bog‘chalarning birida uch yoshli bola tok urishidan vafot etgan edi. Shuningdek, mart oyida ham Buxoro tumanidagi oilaviy nodavlat maktabgacha ta’lim tashkilotida 2023-yilda tug‘ilgan bola tok urishi oqibatida vafot etgan.
Izoh (0)