Индонезияда Қозоғистоннинг икки фуқароси гиёҳванд моддалар билан боғлиқ жиноятда айбланиб, ҳибсга олинди. Бу ҳақда Қозоғистон Ташқи ишлар вазирлигига таяниб Tengrinews хабар берди.
Ҳозирда Индонезия ҳуқуқни муҳофаза қилувчи органлари томонидан дастлабки суриштирув ишлари олиб борилмоқда. Бошқа тафсилотлар ошкор қилинмаяпти.
Қозоғистоннинг Жакартадаги элчихонаси тергов органлари ва айбланувчиларнинг яқинлари билан алоқада бўлиб турибди. Масала қозоғистонлик дипломатлар назорати остида, дейилади ТИВ хабарида.
Қозоғистон фуқаролари 2025 йил апрелида қўлга олинган. Улардан 49 граммга яқин кристалл метамфетамин топилган. Улар гиёҳванд моддаларни тарқатишда айбланмоқда ва ўлим жазосига ҳукм қилиниши мумкин.
Индонезия қонунчилигига кўра, гиёҳванд моддаларни сақлаш ёки сотиш оғир жиноят ҳисобланади. Марихуана каби қайта ишланмаган моддалар бир килограммдан, героин ёки кокаин каби қайта ишланган моддалар эса беш граммдан ошса, умрбод қамоқ жазоси қўлланилиши мумкин.
Индонезия миграция ва ахлоқ тузатиш вазирлигининг сўнгги маълумотларига кўра, мамлакатда 530 га яқин одам, шу жумладан 96 нафар хорижлик, асосан гиёҳванд моддалар билан боғлиқ жиноятлар учун ўлим жазосига ҳукм қилиниши мумкин.
Изоҳ (0)