Casio компанияси ўзининг тиббиёт соҳасидаги фаолиятини кенгайтириб, Тайван бозорида гинекологик диагностика учун мўлжалланган махсус ускунани тақдим этди. 2025 йил 30 июль куни Тайваннинг озиқ-овқат ва дори воситалари назорати агентлиги (ТFDA) DZ-C100 колпокамераси ва уни ўрнатиш учун CSТ-100М махсус таянч (стойка) ни II тоифадаги тиббий қурилма сифатида расман рўйхатга олди.
DZ-C100 колпокамераси бачадон бўйнидаги турли ўзгаришларни ҳамда саратон касаллигини эрта босқичда аниқлаш имконини беради. Қурилма ёрдамида бир нечта юқори аниқликдаги тасвирлар олинади. Улар стандарт, яшил филтрли ва поларизацияланган каби турларга ажратилади. Мазкур камерага сенсорли бошқарув тизими ўрнатилган бўлиб, мутахассислар бевосита қурилманинг экранида зарурий текширувларни ўтказишлари мумкин.
Камерани ўрнатиш учун ишлаб чиқилган CSТ-100М таянчи эса баландлик ва бурчакни мослаб, фойдаланиш жараёнини янада қулайлаштиради. Ушбу мослама турли иш шароитларига мос ва эргономик жиҳатдан қулай тарзда ишлаб чиқилган.
Қурилма билан комплект тарзда алоҳида дастурий таъминот — D’z Image Viewer C ҳам ўрнатилиб, у компьютер орқали олинган тасвирларни кўриш, сақлаш ва тартиблаш вазифасини бажаради.
Ускунанинг тўлиқ тўплами, яъни DZ-C100 камера ва CSТ-100М стойкадан иборат DZ-C100SЕТ модели, 495 000 тайван доллари (тахминан 16 700 АҚШ доллари) нархга баҳоланган. Ҳар бир компонентни алоҳида сотиб олиш ҳам мумкин: камеранинг ўзи 165 000 тайван доллари (тахминан 5560 доллар), таянч 365 000 тайван доллари (тахминан 12 300 доллар)ни ташкил қилади.
Саратонни аниқловчи ушбу қурилма дастлаб 2022 йилнинг март ойида Японияда сотувга чиққан бўлиб, 2023–2024 йиллар давомида Европа, АҚШ, Австралия ва Янги Зеландияда жорий этилган. Тайванда ушбу қурилма Casio’нинг шу ерда фаолият юритувчи шўба корхонаси томонидан ишлаб чиқарилмоқда.
Авваллари соат, калкулятор ва бошқа электроника маҳсулотлари билан машҳур бўлган Casio компанияси эндиликда тиббий диагностика соҳасига ҳам кириб келмоқда ва бу орқали ўз фаолият йўналишини кенгайтирмоқда.
Изоҳ (0)