Индонезия армияси Туркиянинг KHAN ITBM-600 баллистик ракета тизимини ўз инвентарига қабул қилиб олди. Бу ҳақда мудофаа соҳасига ихтисослашган Sahabat Keris платформаси Шарқий Калимантандаги ҳарбий базада олинган суратларга асосланиб хабар берди.
Жакарта 2022 йил Рокетсан компанияси билан бу бўйича тегишли шартнома имзолаган эди. Tatra 8×8 платформасига асосланган тизим ўзининг юқори ҳаракатчанлиги билан жанговар амалиётларни қисқа вақт ичида бажариш имконини беради.
Ишлаб чиқарувчига кўра, KHAN тизимининг жанговар радиуси 280 километргача бўлиб, рақиб нишонларига юқори аниқликда зарба беришда қўлланилади. Ракета GPS ва унинг русча муқобили GLONASS навигация тизимлари ёрдамида ишлайди.
KHAN Индонезиянинг узоқ масофага зарба бериш салоҳиятини оширади. Мазкур қадам потенциал таҳдидларга тезкор жавоб қайтаришга қаратилган кенг кўламли модернизация дастурининг бир қисмидир.
Аммо икки давлат ўртасидаги ҳамкорлик бу билан чекланмайди. Индонезия Истанбулда ўтган IDEF2025 халқаро кўргазмасида Туркиядан KAAN қирувчи самолётларини сотиб олиш бўйича келишувга эришди. Тахминан 10 миллиард долларлик шартнома доирасида турклар 48 та ҳаво борти етказиб беради.
Изоҳ (0)