Испаниянинг “Реал Мадрид” клуби ҳужумкор ярим ҳимоячиси Браим Диас фаолиятини Италия А Сериясида давом эттириши мумкин. Бу ҳақда Fichajes нашри хабар берди.
Манбага кўра, “қироллик клуби” ёзги трансфер ойнаси вақтида аргентиналик вингер Франко Мастантунони харид қилди. Шунингдек, Родриго ҳам жамоада қолишни истамоқда. Бу ҳолат Браим Диаснинг асосий таркибда майдонга тушиш имкониятини пасайтириши мумкин. Футболчининг ўзи ҳам клубдаги рақобат катта эканлигини тушуниб турибди ва кўпроқ ўйин амалиётига эга бўлиш учун жамоани тарк этишга тайёр.
Диаснинг аввалги жамоаси — “Милан” футболчини ортга қайтариш имкониятини жиддий кўриб чиқмоқда. Марокашлик футболчи аввалроқ “россонерилар” сафида ижарада ўйнаган. Шу билан бирга, “Наполи” ва “Интер” клублари ҳам 26 ёшли футболчининг хизматларига қизиқиш билдирмоқда.
Қайд этилишича, А Сериянинг етакчи клублари Браим Диасни 40 миллион евро эвазига сотиб олишга тайёр. Бироқ “Реал Мадрид” раҳбарияти футболчининг қийматини 50 миллион еврога баҳоламоқда.
- Браим Диас 2024/25 йилги мавсум “Реал Мадрид” сафида жами 56 та ўйинда майдонга тушиб, ўз ҳисобига 6 та гол ва 8 та голли узатма ёздириб қўйган.
- Transfermarkt портали футболчининг қийматини 40 миллион еврога баҳоламоқда.
- Унинг клуб билан шартномаси 2027 йилнинг ёзига қадар амал қилади.
Изоҳ (0)