Ўзбекистон Суперлигасининг 13-тури доирасида навбатдаги икки учрашув бўлиб ўтди. Тошкентдаги “Жар” стадионида “Пахтакор” жамоаси “Қўқон-1912”ни 2:0 ҳисобида мағлуб этди. Ғузорда эса “Шўртан” “Сурхон”ни 2:1 ҳисобида енгди.
Тошкентдаги учрашувнинг ҳисобини 17-дақиқада Диёр Холматов очди. У ажойиб комбинацион ҳужум якунида тўпни дарвозага йўллаб, “Пахтакор”ни олдинга олиб чиқди.
Ўйин якунига яқин — 90+5-дақиқада Брайан Риаскос рақиб дарвозасини ишғол қилиб, якуний натижани белгилади — 2:0. Ушбу ғалаба эвазига “Пахтакор” ўз очколари сонини 22 тага етказиб, турнир жадвалида 6-ўринга кўтарилди. “Қўқон-1912” эса 12 очко билан 14-поғонани эгаллаб турибди.
Ғузорда кечган ўйин анча қизғин бошланди. Учрашувнинг 7-дақиқасида Ҳумоюн Шербўтаев ҳисобни очиб, “Сурхон”ни олдинга олиб чиқди — 0:1.
34-дақиқада меҳмонлар бир ўйинчидан маҳрум бўлди. Суннат Ҳамиджонов ҳакам томонидан қизил карточка билан жазоланди. Ушбу вазиятдан кейин мезбонлар ташаббусни ўз қўлига олди.
Биринчи бўлимнинг 45+2-дақиқасида Ғанишер Қодиров ҳисобни тенглаштирди. Иккинчи бўлимнинг 66-дақиқасида эса Аброр Тошқўзиев “Шўртан”нинг ғалаба голига муаллифлик қилди.
Ушбу натижа ўйиннинг охиригача ўзгармади. “Шўртан” 3 очкони қўлга киритиб, очколар сонини 9 тага етказди. Шунга қарамай, жамоа турнир жадвалининг сўнгги поғонасида қолмоқда. “Сурхон” эса 14 очко билан 11-ўринни эгаллаб турибди.
Ўзбекистон Суперлигаси
13-тур
22 июнь, якшанба
“Пахтакор” — “Қўқон-1912” 2:0
Голлар: 1:0 — Диёр Холматов (17), 2:0 — Риаскос (90+5).
“Шўртан” — “Сурхон” 2:0
Голлар: 0:1 — Ҳумоюн Шербўтаев (7), 1:1 — Ғанишер Қодиров (45+2), 2:1 — Аброр Тошқўзиев (66).
Изоҳ (0)