Ўзбекистон Профессионал футбол лигаси бир нечта ҳолат бўйича регламент бузилиши ҳолатини қайд этиб, Тартиб-интизом қўмитасига тақдим этган.
ПФЛ Ўзбекистон Футбол Ассоциацияси Тартиб-интизом қўмитасининг навбатдаги йиғилишида тўғридан-тўғри қизил карточкалардан ташқари яна қатор масалалар кўриб чиқилишини маълум қилган. Қуйида уларнинг айримларига тўхталиб ўтилган:
“Бухоро”
Про Лига илк туридан ўрин олган “Шўртан“ — “Бухоро” ўйинида меҳмон клуб қайдномани тўлдиришни ярим соатга кечиктирган. Ваҳоланки, регламентда мазкур масала аниқ ёзиб қўйилган. Талаб тушунарсиз сабабга кўра бажарилмаганидан келиб чиқиб, “Бухоро” клуби жарима тўлаши белгиланган. ПФЛ клуб бундай масъулиятсизлик сабабини кўриб чиқиши ҳамда ўз ишига масъулиятсизларча ёндошган ишчисига нисбатан чора кўриш ваколатига эга.
“Машъал”
“Машъал” футбол клуби ПФЛ томонидан ўтган мавсум стадион периметри бўйлаб жойлашган реклама шитлари масаласида бир неча бор огоҳлантирилганига қарамай, 2024 йилги мавсумни ҳам худди шундай камчиликлар билан бошлаган. Бунинг учун клубга жарима қўлланилиши белгиланган.
“Андижон”
“Андижон” футбол клуби “Бобур арена” стадиони мезбонлик қилган “Бунёдкор”га қарши ўйинда электрон реклама шитлари билан боғлиқ Лига талабини бажармаган. Клубнинг Андижон вилоятидаги айрим ташкилотлар билан муаммоси Лигага маълум эканлиги таъкидланиб, ушбу муаммолар Лига муаммосига айланмаслиги шартлиги эслатиб ўтилган.
“Динамо”
“Динамо” мураббийлар штабидан жой олган Андрей Пятницкий ОКМК клубига қарши ўйин вақтида электрон сигарета чеккани учун жаримага тортилади. ПФЛ баёнотида ҳар қандай мутахассис Регламентга амал қилишга мажбур эканлиги айтилган.
“Нефтчи”
Суперлига 3-туридан ўрин олган “Нефтчи” — “Металлург” учрашуви давомида футбол мухлислари меҳмонлар захира ўриндиғи томон сувли идишлар улоқтирган. Улардан бири мураббийлардан бирига бориб теккан. Шунингдек, “Нефтчи” ғалаба голини уриб, уни нишонлаётган вақтида қарама-қарши тарафдан сувли идишлар стадионга улоқтирилган. Бу каби ҳолатлар Фарғонада ўтган мавсум ҳам кузатилган. ПФЛ “Нефтчи”нинг фаол ва фидойи мухлисларини ҳурмат қилган ҳолда уларрни ён-атрофидаги ақлсиз кишиларни тийишга чақирган. Ҳолат учун “Нефтчи” жаримага тортилади.
“Пахтакор”
Суперлига 2-туридан ўрин олган “Пахтакор” — “Насаф” учрашуви вақтида медиа трибунадан мазкур ҳудудга кириш рухсатини берувчи аккредитацияга эга бўлмаган қатор шахслар ўрин олган. Бу эса табиийки, ОАВ вакиллари фаолиятига халақит беради. Ҳолат учун “Пахтакор” жарима тўлаши белгиланган.
5 та клуб жарима тўлайди
Футболчининг функсионал ҳолатини масофадан туриб мониторинг қилиш имконини берувчи мослама икки мавсумдан буён Суперлига қайдномасидан ўрин олган ҳар бир футболчида бўлиши, учрашувдан кейин клуб таҳлил натижаларини ЎФА учун тақдим этиши керак. Ўтган мавсум ўз ишига масъулиятсиз ёндошган клублар бунинг учун катта жаримага тортилганди. Бироқ жорий мавсумнинг дастлабки уч турида ҳам бу каби ҳолатлар кузатилди. Регламентдаги талаб янги бўлмагани, клубларда вазиятни ҳал қилиш учун 2 йилдан ортиқ вақт бўлганини инобатга олиб, бу борада ҳеч қандай изоҳ қабул қилинмайди ва клублар жарима тўлайди. Булар: “Сурхон”, “Андижон”, “Динамо”, “Насаф” ва “Нефтчи”.
“Шунингдек, янги қоидага кўра 3 ҳолат бўйича олинган огоҳлантиришлар жаримага сабаб бўлади. Ўтган уч тур давомида ҳакам ишига аралашиш ҳолатлари 17 марта, вақтни чўзиш ҳолати 7 марта ва симуляция 3 марта огоҳлантиришга сабаб бўлган. Мазкур ҳолатларнинг барчаси учун тегишли шахслар жаримага тортилади”, — дейилади ПФЛ баёнотида.
Изоҳ (0)