Давлат хизматчисининг совға билан боғлиқ талабларга риоя этилмаганлик учун жавобгарлиги масаласи кўриб чиқилмоқда. Бу ҳақда Коррупцияга қарши курашиш агентлиги матбуот хизмати “Дарё”га маълум қилди.
2023 йилнинг март ойида Коррупцияга қарши курашиш агентлиги директорининг буйруғи билан “Давлат фуқаролик хизматчиси томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек, уни тасарруф этиш тартиби тўғрисида”ги низом тасдиқланган. Ушбу низом талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўлиши қайд этилган. Лекин айнан қандай жазо қўлланиши кўрсатиб ўтилмаган.
“Дарё” нашри томонидан низом тасдиқлангандан буён қанча давлат фуқаролик хизматчисига нисбатан чора кўрилгани ҳақидаги сўровга агентлик матбуот хизмати қуйидагича жавоб берди:
Жорий йилнинг 5 март куни ўтказилган Коррупцияга қарши курашиш миллий кенгаши йиғилишида президент томонидан берилган топшириқ ва вазифалар ижроси юзасидан ишлаб чиқилаётган норматив-ҳуқуқий ҳужжатлар лойиҳаси доирасида давлат хизматчисининг совға билан боғлиқ талабларга риоя этилмаганлик учун жавобгарлиги масаласи ҳал этилмоқда.
Давлат хизматчиси совғани қай тартибда олса бўлади?
Давлат фуқаролик хизматчиси Ўзбекистондан ташқаридаги хизмат сафарлари, халқаро ва бошқа расмий тадбирлар, Ўзбекистонда ўтказиладиган халқаро ва бошқа расмий тадбирларда совға олиши мумкин.
Ўзбекистондаги бошқа хизмат сафарларида совға олиши мумкин эмас.
Давлат фуқаролик хизматчиси оладиган совға қуйидаги талабларга жавоб бериши керак:
🔹миллий қонунчиликда тақиқланмаган ашёлар бўлиши;
🔹совға халқаро ва бошқа расмий тадбирда ихтиёрий берилган бўлиши;
🔹совға очиқ ва ошкора қабул қилиниши;
🔹давлат органининг обрўсига путур етказмаслиги;
🔹манфаатлар тўқнашуви ёки коррупциявий омилни келтириб чиқармаслиги.
Давлат фуқаролик хизматчиси совғани тадбирдан келгандан сўнг 3 иш кунида хўжалик бўлимига беради ва бунда далолатнома тузилади.
Совғанинг қиймати аниқ бўлмаса, хўжалик бўлими уни баҳолайди ва унинг қиймати БҲМнинг 4 бараваридан (1,5 миллион сўмдан) кўп бўлмаса, совға давлат фуқаролик хизматчисига берилади.
Совға қиймати БҲМнинг 4 бараваридан кўп бўлса, у молия-иқтисод бўлинмаси томонидан давлат органи балансига кирим қилинади ҳамда давлат органи эҳтиёжи учун фойдаланилади.
Тез яроқсиз ҳолга келувчи совғалар (гул, ширинликлар), шунингдек, канселярия тўпламлари (тақвим, буклет, пластмассали ручка, кундалик ва блокнот) совға сифатида расмийлаштирилмайди ҳамда ушбу совғалар давлат фуқаролик хизматчисида қолдирилади.
Мазкур низом талаблари барча давлат фуқаролик хизматчилари учун мажбурий ҳисобланади.
Изоҳ (0)