Аввалроқ Жиззахда ички ишлар ходимлари фуқарони калтаклагани айтилаётгани ҳақида хабар берилганди. Жиззах вилояти ИИБ ҳолат юзасидан изоҳ берди.
Маълум қилинишича, 5 май куни соат 00:35 ларда Арнасой туманидаги овқатланиш шохобчасидан қўриқлаш бўлимига хабар келиб тушган. Соҳа вакиллари етиб борганида маст ҳолатдаги фуқаро Д.Ч. овқат ҳақини тўламагани аниқланади.
Таъкидланишича, фуқаро шохобча ҳовлисида бир неча фуқаролар билан жанжаллашади. Фуқаро Д.Ч. кетмагач ҳолат юзасидан ички ишлар органларига хабар берилади. Чақириқ асосида соат 01:20 ларда ҳудуд профилактика инспектори етиб келади ва фуқародан уйига кетишни сўрайди.
Аммо фуқаро инспекторга бўйсунмайди ва ИИО ходими ҳамкасби билан унинг қўлига кишан солиб, наркология диспансерига етказади, дейилади хабарда.
Вилоят прокуратурасининг маълум қилишича, мазкур ҳолат юзасидан Арнасой туман прокуратураси томонидан терговга қадар текширув ҳаракатлари олиб борилмоқда.
Тўпланган ҳужжатлар асосида қонуний қарор қабул қилиниши Жиззах вилоят прокуратураси томонидан назоратга олинган.
Ҳибсда вафот этаётганлар иши
18 март куни бўлиб ўтган Сенат ялпи мажлисида инсон ҳуқуқлари бўйича вакил (омбудсман)нинг 2024 йилдаги фаолияти муҳокама қилинди.
Муҳокамалар жараёнида сенатор Ҳусан Эрматов президентнинг тегишли қарорига кўра, сўроқ жараёнини стенограмма қилиш, видеокузатув, шунингдек, тергов ҳаракатларини аудио ва видео қайд этиш тизимлари билан жиҳозланган хоналарни ташкил этиш бўйича ишлар қай даражада экани юзасидан ИИВ масъулларига савол берди. Саволга ИИВ ҳузуридаги Тергов департаменти бошқарма бошлиғи Шерзод Шерматов жавоб берди. Унинг айтишича, бугунги кунда департамент ва унинг ҳудудий бўлимларида тергов ҳаракатларини аудио ва видео қайд этиш тизимлари билан жиҳозланган 57 та махсус хоналар ташкил этилган.
Февраль ойида Сурхондарёда сўроққа олиб кетилган фермер вафот этган, ИИВ Жазони ижро этиш департаментининг Олмалиқдаги 14-сонли колониясидан 21 яшар маҳкум — Муҳаммадқодир Пўлатовнинг жасади чиққан эди.
Маълумот учун, қийноқ оқибатида келиб чиққан ўлим ҳолатлари учун жавобгарлик кучайтирилмоқда. Унга кўра, Жиноят кодексига киритилаётган ўзгартириш ва қўшимчаларга мувофиқ 235-модда 3 ва 4-қисм билан тўлдириляпти:
- ушбу модданинг биринчи ёки иккинчи қисмида назарда тутилган ҳаракатлар баданга оғир шикаст етказилишига сабаб бўлса, муайян ҳуқуқдан маҳрум этиб, 8 йилгача озодликдан маҳрум қилиш билан жазоланади;
- ушбу модданинг биринчи ёки иккинчи қисмида назарда тутилган ҳаракатлар жабрланувчининг ўлимига ёки бошқа оғир оқибатларга сабаб бўлса, муайян ҳуқуқдан маҳрум этиб, 8 йилдан 10 йилгача озодликдан маҳрум қилиш билан жазоланади.
Изоҳ (0)