58 ёшли “Оскар” мукофоти совриндори, пуэрто-риколик актёр Бенисио Дел Торо “Сет Майерс билан кечки шоу”да меҳмон бўлиб, Уэс Андерсоннинг жосуслик комедияси — “Финикия схемаси” сценарийси туфайли аэропортда қандай ушлаб қолинганини айтиб берди.
Мен Бостондан Лос Анжелесга учаётган эдим. Нима учундир қўлимдаги багаждан ноутбукни олиб қўймаган эканман. Транспорт хавфсизлик ходимлари сумкамни текшира бошлашди, ичидан сценарийнинг нусхаси чиқди, дея ҳикоя қилди актёр.
Унинг сўзларига кўра, сценарийни ўқиш осонроқ бўлиши учун сарлавҳалар йирик шрифт билан ёзилган эди.
Сценарийда жуда аниқ кўриниб турарди: “1-саҳна: Самолёт салони. Бомба”. “2-саҳна: Учувчилар кабинаси. Учувчи катапульт қилинади”. “3-саҳна: Ҳалокат”, дея эслайди Дел Торо.
Аэропорт ходимларидан бири бу матнни кўриб, ҳеч нарса демай, актёрга ҳаракатсиз қолишни ишора қилган ва беш нафар хавфсизлик ходимини чақирган.
Барчаси охир-оқибат яхшилик билан тугаган. “Трафик” (2000) фильмидаги роли учун “Оскар”га сазовор бўлган машҳур актёрни аэропорт ходимлари таниб қолган.
Фото: Screen Rant
Костюмда, галстук таққан бошлиқ менга бир қаради, афтидан, мени таниди, шекилли, сценарийга кўз югуртириб чиқди-да, мени қўйиб юборди, деди Дел Торо.
Актёр бу воқеадан хафа бўлмаган, аксинча, аэропорт ходимларининг ҳушёрлигини юқори баҳолаган.
Ўша йигитнинг эътиборидан қойил қолиб, унга бош бармоғимни кўрсатдим, дея эслайди у.
“Финикия схемаси” фильми бутун дунё бўйлаб 30 май куни намойиш этила бошланди. Уэс Андерсоннинг янги асари Европадаги энг бой тадбиркорлардан бири ва унинг қизи билан бўлган мураккаб муносабатларга бағишланган.
Фильмда Бенисио Дел Торо билан бирга Билл Мюррей, Том Ҳэнкс, Бенедикт Камбербетч, Скарлетт Йоханссон, Браен Кренстон ва бошқа машҳур актёрлар суратга тушган.
Таниқли танқидчилар фильмни асосан ижобий кутиб олишди. Rotten Tomatoes сайтида 198 та шарҳ асосида “Финикия схемаси”нинг рейтинги ҳозирда 79 фоизни ташкил қилмоқда.
Изоҳ (0)