Toshkent viloyati Parkent tumanida eshak go‘shtidan somsa tayyorlab, sotganlarga hukm o‘qildi.
Ma’lum qilinishicha, Nurafshon shahrida fuqaro o‘ndan ortiq eshakni so‘yib, sotib kelgan. Holat yuzasidan sud majlisi o‘tkazilib, aybdorlarga chora ko‘rildi.
Sud hujjatiga ko‘ra, ayblanuvchilardan biri Nurafshon shahrida so‘yilgan hayvonlarning go‘shtini pishirish uchun sotish maqsadida olib ketayotgan vaqtida ushlangan. U Toshkent shahrida yashovchi fuqaroga 200 kg eshak go‘shtini kilogrammini 20 ming so‘mdan sotmoqchi bo‘lgan.
Toshkent shahridagi fuqaro esa 193 kg eshak go‘shtini 3,8 million so‘mga sotib olayotgan vaqtida ushlandi. Uning uyidan kelib chiqishi noma’lum qo‘shimcha 60 kg go‘sht topilgan. U Parkent tumanida joylashgan tez ovqatlanish shoxobchasida somsa tayyorlash uchun ushbu go‘shtdan foydalangan.
Holat bo‘yicha uch nafar sudlanuvchiga hukm o‘qildi. Jinoyat ishlari bo‘yicha Ohangaron tuman sudining hukmi bilan Jinoyat kodeksining 186-moddasi 2-qismi bilan aybli deb topildi va ularning 2 nafariga 2 yil muddatga ozodlikdan mahrum qilish jazosi tayinlandi. 3-sudlanuvchi esa 3 yil 8 oy 15 kunga ozodlikdan cheklandi.
Oqqo‘rg‘on tumanida eshak suyaklarining suvga tashlab ketilayotgani holatidan boshlangan tadbir Ohangaron tumanida davom ettirilib, 3 nafar shaxs gumonlanuvchi sifatida ushlangani va tergovga qadar surishtiruv olib borilayotgani haqida xabar berilgan edi.
Ijtimoiy tarmoqlarda Surxondaryo viloyatida fuqarolarning eshak so‘ygani aytilgan va hayvonlar jasadi ko‘ringan video tarqalgandi. Viloyat hokimligi axborot xizmati rahbari bu eski video ekanligini bildirgan.
Kuni kecha esa Sirdaryodan Toshkentga olib ketilayotgan 361 kg eshak go‘shti to‘xtatib qolingan.
Ma’lumot uchun, eshak terisi va ichagi tibbiyotda subtovar sifatida foydalaniladi. Qonunchilikda eshak go‘shtini iste’mol qilish yoki sotganlik uchun javobgarlik yo‘q. Faqat eshak go‘shtini boshqa hayvon, masalan, mol go‘shti deb sotganlik uchun javobgarlik mavjud.
Izoh (0)