Ўзбекистонда 15–49 ёшли аёллар сони 9,4 миллиондан ошди. Бу ҳақда Статистика қўмитаси хабар берди.
Миллий статистика қўмитаси маълумотларига кўра, 2025 йил 1 январь ҳолатига кўра, Ўзбекистонда 15–49 ёш тоифасига мансуб аёллар сони 9 миллион 424 минг нафарни ташкил этди.
Таъкидланишича, бу кўрсаткич йиллар давомида барқарор ўсишни намоён этмоқда. Қуйида мазкур тоифадаги аёллар сонининг йиллар бўйича динамикасини кўриш мумкин:
- 1991 йил — 4 821,2 минг киши;
- 1995 йил — 5 418,5 минг киши;
- 2000 йил — 6 289 минг киши;
- 2005 йил — 7 172,2 минг киши;
- 2010 йил — 7 945,4 минг киши;
- 2015 йил — 8 649,3 минг киши;
- 2020 йил — 8 982,3 минг киши;
- 2025 йил — 9 424 минг киши.
Демографик динамика мамлакатда аҳоли таркиби ва ижтимоий сиёсат юзасидан муҳим маълумотлардан бири ҳисобланади. Айниқса, репродуктив ёшдаги аёллар сонининг ортиши соғлиқни сақлаш, таълим ва меҳнат бозорида стратегик режалаштириш учун муҳим асос ҳисобланади.
Ўзбекистонда аёллар олий таълимда эркакларни ортда қолдирмоқда
Ўзбекистонда олий таълим билан қамраб олинган 18–23 ёшдаги аёллар улуши ошгани маълум бўлди.
2024/25-ўқув йили бошида Ўзбекистонда 18–23 ёшдаги аҳолининг олий таълим билан қамраб олиниши 47,7 фоизни ташкил этди. 2024 йил ҳолатига кўра, 18–23 ёшдаги аёллар орасида олий таълим билан қамраб олинганлар сони 52,4 фоизни ташкил қилган. Солиштириш учун, бу кўрсаткич 2014 йилда бор-йўғи 5,2 фоиз эди.
Шунингдек, 18–23 ёшдаги эркаклар орасида бу рақам 2023 йилдаги 43,7 фоиздан 2024 йилда 43,5 фоизга бир оз пасайган.
Ўзбекистонда жами талабаларнинг 782 мингини хотин-қизлар ташкил қилиши ҳақида хабар берилганди.
1 апрель ҳолатига Ўзбекистонда доимий яшовчи аҳоли сони 37,7 млн кишини ташкил этган. Бу кўрсаткич, 2024 йилнинг мос даврига нисбатан 2 фоизга кўпайган.
Шундан:
- Аёллар сони — 18 714,9 минг киши;
- Эркаклар сони — 18 982,9 минг киши;
- Шаҳар жойларда — 19 216,4 минг киши;
- Қишлоқ жойларда — 18 481,4 минг киши.
Ўзбекистонда 2025 йилда неча киши вафот этиши мумкинлиги прогноз қилинган эди. Ўзбекистонда ўлимлар сони 2025 йилда 223,9 минг кишини ташкил этиши тахмин қилинмоқда. Статистика агентлиги маълумотларига кўра, Ўзбекистонда ўртача умр кўриш давомийлиги 74,3 ёшни ташкил этади. Мамлакатда ўлим ҳолатларининг ярмидан кўпи қон айланиш тизими касалликлари сабаб юз бермоқда.
Изоҳ (0)