Исландия собиқ президенти Гудни Торлациус Йоханнессон миллий Тингвеллир боғида гид сифатида ишга жойлашди. Бу ҳақда Iceland Моnitor хабар берди.
Журналист билан суҳбатда Йоханнессон боғда қандай иш топганини эслади.
Мен 2024 йил 17 июнда, худди бугунгидай ажойиб кунда Тингвеллирда эдим ва боғ бошқарувчиси Эйнар Семундсен билан гаплашдим. Келажагим ҳақида суҳбатлашдик ва мен: “Шунчаки бориб иш қидиришим керак эмасми? деб сўрадим. У “Бу ерга келиб ишлашни хоҳламайсанми?” деганди, дейди Йоханнессон.
Исландиянинг собиқ раҳбари хизмат кўрсатиш марказида саволларга жавоб беради ва сайёҳларни боғ бўйлаб олиб юради. Йоханнессон бу ишни ўзининг давлат хизматидаги фаолиятининг давоми деб билади.
Бу жой ва Исландия тарихи ҳақида сўзлаб бериш мен учун катта шараф. Ташриф буюрувчиларнинг кўпчилиги кимлигимни билмайди ва бу жуда ажойиб, дейди собиқ президент жилмайиб.
Тингвеллирдаги вазифаларидан ташқари, Йоханнессон тарихчи сифатида фаолиятини давом эттирмоқда ва Исландия университетида доцент лавозимида ишлайди.
Гвидни Йоханнессон 2016 йилда 39,1 фоиз овоз билан Исландия президенти этиб сайланган, 2020 йилда у қайта сайланган. У ғалаба қозонганини айнан туғилган куни билган — ўша пайтда унга 48 ёш тўлган эди. Ундан олдинги президент — Оулавюр Рагнар Гримссон — бу лавозимда 20 йил ишлаган ва 73 ёшида истеъфога чиққанди.
2024 йилда Исландияда бўлиб ўтган президентлик пойгасида тадбиркор Халла Томасдоттир (34,3 фоиз овоз) ғолиб бўлди. У Исландиянинг иккинчи аёл президентидир. Сайловда иккинчи ўринни Исландия собиқ бош вазири Катрин Якобсдоттир (25,2 фоиз овоз), учинчи ўринни Арктика муаммолари тадқиқотчиси Халла Хрунд Логадоттир (15,5 фоиз овоз) эгаллаганди. Сайловда жами 12 нафар номзод иштирок этган, уларнинг ярми аёллар бўлган.
Изоҳ (0)