Рустам Саъдиев «Барон-2»да нима сабабдан Улуғбек Қодиров роль ўйнамагани, суратга олишда қайси масалаларда қийналгани ва фильмдаги кесилган саҳналар ҳақида (видео)

Режиссёр Рустам Саъдиев «Chotki TV» YouTube каналига берган интервьюсида «Барон-2. Соғинч» фильмининг кулминацион воқеаси, нима учун фильмда Улуғбек Қодиров роль ўйнамагани, фильмни суратга олишда қайси масалаларда қийналгани ва кинокартинанинг кесилган жойлари ҳақида гапирди.

Рустам Саъдиев «Барон-2. Соғинч» фильмининг кулминацион воқеаси ҳақида 

Айнан битта кадрда маза қилдим деб айта олмайман, унда ўзим жунбушга келиб олинган кадрлар ҳам бор. Мен умуман кутмаган кадрда томошабиннинг реакцияси бўлади. Масалан, Дилноза Кубаева билан боғлиқ саҳна, яъни у ҳам  аёл, фильмдаги воқеаларда уни турмуш ўртоғининг бошига кулфат тушганда сезиши, аёллар сезади.

Аёллардаги сезги ҳолати хавотирли, ўшандан кейин оилавий ришталарнинг қандай боғлангани, бу ерда эрини неча йиллар давомида кўрмаётган аёлнинг қисмати, психологик ҳолати, ундан ташқари бошқа юртда жасорат кўрсатаётган разведкачи турмуш ўртоғининг ҳолати, умуман, кинони олишни бошлаганимда мана шу ҳолат кўз олдимда турарди.

Танқидчилар Дилноза Кубаеванинг фарзанд дунёга келтираётган саҳнаси сал қўпол олингани ҳақида ҳам фикр билдирди, майли, бу ҳам битта фикр. Бу операторнинг қарори, менга маъқул бўлган. У ерда ҳеч қандай ёмон кадр йўқ, ўйлайманки, шу кинонинг кулминацион саҳнаси бўлган, — дейди режиссёр.

Улуғбек Қодиров жуда истеъдодли актёр, мен ҳар доим бу ҳақда гапираман. Гап унинг қиммат актёрлигида эмас, бу кинода ундан беш-ўн баравар қиммат актёрлар роль ўйнади, кинода пул аҳамиятга эга эмас.

Бу глобал мавзу, фильмга эътибор бошқача, маблағ жиҳатидан ҳам вазият бошқача. Шунинг учун бу ерда маблағ катта роль ўйнамайди. Биринчи воқеликда Улуғбек роль ўйнаган, иккинчи воқеликда унинг образидаги ижро тугаган. Агар ўша воқеа, ғоя давом этганда у бўлиши мумкин эди.

Бу ерда қаҳрамон янги топшириқ билан бошқа жойга кетяпти, ундан кейин янги воқеалар бошланиб кетмоқда. Шунинг учун бу табиий ҳол, томошабинда биринчи қисмида Улуғбек Қодиров роль ўйнади, иккинчисида ҳам ўйнайди деган тушунча бор, бироқ ҳамма нарса бўлиши мумкин. Балки иккинчисида ўйнамай учинчисида ҳам ўйнаши мумкин, — дейди Рустам Саъдиев.

Режиссёр «Барон-2. Соғинч» фильмини суратга олишда қайси масалаларда қийналгани 

Бу фильм жуда кўп синовлардан ўтди. Пандемия бўлди, фильм воқеаларини кўп давлатларда олдик, шунда иккита давлатнинг муносабати таъсирига тушиб қолди. Масалан, Мисрда суратга олиш ишлари бўлаётган вақтда Туркиянинг актёрларини шу ерга олиб келишга тўғри келди. Шунда Мисрнинг 40 ёшгача бўлган эркакларига виза бериши жуда қийин экан, уни ўзини сиёсий сабаблари бир экан, билмадим. Бу масалага бизнинг Ташқи ишлар вазирлиги, элчихона вакиллари керак бўлса Миср турк актёрларига виза бермагани учун нота билан чиқди.

Кейин улар бу мамлакатга инвестиция киритаётганини айтди ва улар турк актёрларини 24 соатда ҳамма актёрларни чиқаришини айтди. Бу ёқдан ҳар бир пулимиз ҳисоб-китоб қилинаётган эди. Шундан пайтда ҳамма нарса ўзимга қолиб кетди, продюсер ҳеч нарса қила олмаган ҳолат бўлди.

Кинонинг ташкилий жиҳатларида ёмон қийналганман. Мен ҳеч қайси кинофильмимда бунчалик қийналмаганман. Қийналганим шу — ташкилий жиҳатларда, пулнинг вақтида етиб келмаганида кўп қийналдим, шу нарса бор экан, ўтиб кетдим, — дейди режиссёр.

Фильмдаги энг узун саҳна қизларни қандай йўл билан чет элга олиб чиқиш жараёни бўлган, шу энг узун диалог ҳам ҳисобланади. Сабаби у ерда олдимиздаги вазифа шунақа бўлган, нафақат бизнинг қизларимиз, балки Ўрта Осиёдаги қизларни, аёлларни, бева аёлларни шунақа йўл билан бошқа жойларга олиб чиқиб кетишмасин деб ўша жойини сал очиб беришга мажбур бўлганмиз, кинода атайин шундай қилинган. Қолган жойларида унча чўзилган деб ҳисобламайман.

Кинонинг озгина жойлари кесилган, кинотеатрларни ҳам назарда тутиб кесилган, фильм икки соатдан узун бўлса, томошабинни қабул қилиш руҳияти чарчаб қолади деган фикр ҳам йўқ эмас.

Шунинг учун ҳаракат қиламан, динамика бўлса икки соат ҳам тез ўтиб кетади, ўша маънода кесилган жойлари бор. Бироқ бир хил воқеаларини кесамиз, айримларини оламиз. Қўрқмасдан айта оламанки, Россиядаги вариантидан кўра Ўзбекистондаги вариантидан менинг кўнглим тўлди. Бу ерда ўзбекнинг озгина қалбини черта оладиган тўхталишлар бор. Руслар шуни кесиб-кесиб ўтказиб юборишган. Қозоғистонлик бир мухлис келиб, Қозоғистонда ҳам шу вариантини қўйинглар, илтимос, деди, чунки Россия кўп воқеаларини кесиб ташлаган, — дейди Рустам Саъдиев.

• «90 фоизи бир тийинга қиммат». Режиссёр Рустам Саъдиев ҳозирги ўзбек сериаллари ҳақида (видео).
• Рустам Саъдиев 85 фоиз роллар жаҳон киноюлдузлари томонидан ижро этилган «Барон 2» фильми қачон премьера қилиниши ҳақида (видео).
• «Барон-2. Соғинч». Рустам Саъдиевнинг соғлиғини йўқотишига сабаб бўлган фильмнинг ёпиқ тақдимотидан репортаж (фото ва видео).