Президент Шавкат Мирзиёев Самарқанд шаҳрига жўнаб кетди. Бу ҳақда Президент матбуот хизмати хабар берди.
28—29 май кунлари Италия бош вазири Жоржа Мелони расмий ташриф билан Ўзбекистонда бўлади.
Самарқандда бўлиб ўтадиган олий даражадаги музокараларда Ўзбекистон—Италия стратегик шериклик муносабатларини янада мустаҳкамлаш ва кўп қиррали ҳамкорликни кенгайтириш масалалари кўриб чиқилиши режалаштирилган.
2023 йил 8 июнь куни Ўзбекистон президенти Шавкат Мирзиёев Италияда Жоржа Мелони билан музокаралар ўтказганди. Етакчилар икки мамлакат ўртасида Стратегик шериклик муносабатларини ўрнатиш тўғрисидаги қўшма декларацияни қабул қилганди.
Шунингдек, 11 та давлатлараро, ҳукуматлараро ва идоралараро ҳужжатларни алмашиш маросими ҳам бўлганди. Ташқи ишлар вазирликлари ўртасида 2026 йилга қадар маданий алмашинувлар дастури қабул қилинганди.
2023 йил 10 ноябрь куни Италия бош вазири Сержо Маттарелла расмий ташриф билан Ўзбекистонга келганди. Давлат раҳбарлари академик алмашинувларни кенгайтириш, қўшма Таълим форумини ўтказиш зарурлигини таъкидлаганди.
Халқаро ва минтақавий аҳамиятга молик долзарб масалалар, хавфсизликка умумий таҳдид ва хатарларга қарши курашишдаги ҳамкорликни давом эттириш юзасидан ҳам фикр алмашилганди.
Изоҳ (0)