Ўзбекистонда Италия етакчи компаниялари билан Технологик шериклик дастурини ишга тушириш таклиф қилинди

Самарқанд шаҳридаги Конгресс марказида 29 май куни  Шавкат Мирзиёев ва Италия бош вазири Жоржа Мелонининг юзма-юз ҳамда расмий делегациялар иштирокидаги музокаралари бўлиб ўтди.

Президент матбуот хизматининг хабар қилишича, икки томонлама стратегик шериклик муносабатларини янада ривожлантириш ва кўп қиррали ҳамкорликни кенгайтириш масалалари кўриб чиқилди. Томонлар фаол сиёсий алмашинувни давом эттиришни қўллаб-қувватлади.Жорий йил апрель ойида Самарқандда ўтган самарали саммитни ҳисобга олган ҳолда Европа Иттифоқи институтлари билан фаол ҳамкорлик давом эттирилади. Амалий натижаларга эътибор қаратган ҳолда “Марказий Осиё—Италия” саммитини ўтказиш муҳимлиги таъкидланди.

Савдо соҳасида бизнесга техник кўмак дастурларини кенгайтиришга келишиб олинди. Европа Иттифоқи бозорига чиқиш учун ўзбекистонлик экспортчиларни ўқитиш, Тошкентда қўшма Сертификатлаш марказини ташкил этиш, Мувофиқликни баҳолаш тўғрисидаги битимни қабул қилишни тезлаштириш шулар жумласидан. Давлат раҳбари Италиянинг етакчи компаниялари билан Технологик шериклик дастурини ишга туширишни таклиф қилди.

Хусусий тадбиркорликнинг инновацион лойиҳалари, ўта муҳим минераллар ва қишлоқ хўжалиги хом ашёсини чуқур қайта ишлаш, автомобилсозлик учун бутловчи қисмлар, электротехника, энергетика, озиқ-овқат, фармасевтика, қурилиш саноатида юқори технологияли маҳсулотлар ишлаб чиқариш, тўқимачилик, чарм, мебелсозлик ва бошқа тармоқлар учун дизайн марказларини ташкил этиш устувор йўналишлар сифатида қайд этилди.

Бундай лойиҳалар Европа оператори бошқарувида Тошкент вилоятида ташкил этиладиган саноат паркида жойлаштирилиши мумкин.

Лойиҳаларни қўллаб-қувватлашнинг янги механизмларини ишга тушириш учун қўшма инвестисия жамғармасини ташкил этиш, шунингдек, Италиянинг SACE ва SIMEST давлат агентликларини жалб қилиш масаласи кўриб чиқилади.

Комплекс “йўл харитаси” асосида қишлоқ хўжалигида илмий-технологик ҳамкорликни ривожлантиришга алоҳида эътибор қаратилди. Uzum, зайтун, заъфарон, сарсабил етиштириш, агролабораториялар ташкил этиш, биотехнологияларни ривожлантириш ва агросуғуртани жорий қилиш бўйича кооперация истиқболлари қайд этилди.

Янги лойиҳаларни илгари суриш мақсадида ҳукуматлараро гуруҳ ишини қайта тиклаш ва унинг йиғилишини бизнес форуми билан бирга ўтказишга келишиб олинди.

Ўзбекистон ва Италия ҳудудлари ўртасидаги шериклик муносабатларини кенгайтириш доирасида Ломбардия губернатори Аттилио Фонтана ташрифи ва биринчи ҳудудлар форуми доирасида амалий натижаларга эришиш муҳим экани таъкидланди.

Таълим соҳасида Ўзбекистонда Тушия университети филиалини, Пиза, Тренто, Рома Тре ва Ка-Фоскари университетлари билан икки томонлама диплом дастурларини ишга тушириш режалари қўллаб-қувватланди.

Ўзбекистонда Италия маданияти кунларини ўтказишга келишиб олинди.

Ташриф доирасида меҳнат миграцияси соҳада тизимли ҳамкорликни йўлга қўйишга қаратилган битим имзолангани мамнуният билан қайд этилди. Учрашув якунида эришилган келишувларни амалга ошириш бўйича комплекс “йўл харитаси”ни тайёрлаш тўғрисида қарор қабул қилинди.

Италия бош вазиринининг Самарқандга ташрифи

Италия бош вазири Жоржа Мелони  Шавкат Мирзиёев таклифига биноан 28 май куни расмий ташриф билан Ўзбекистонга келди.  Самарқанд халқаро аэропортида бош вазирни Ўзбекистон етакчиси кутиб олди. Сўнг давлат раҳбарлари Самарқанд шаҳридаги Регистон майдонида, Silk Road Samarkand халқаро туризм марказидаги “Боқий шаҳар” тарихий-этнографик боғида бўлди. Рақс жамоаларининг чиқишларидан иборат маданий дастур намойиш этилди.

29 май куни Италия бош вазирини расмий кутиб олиш маросими бўлиб ўтди. 

Ўзбекистон—Италия ҳамкорлиги

Кейинги йилларда товар айирбошлаш ҳажми, шу жумладан етказиб берилаётган маҳсулотлар турининг кенгайгани ҳисобига қарийб 3 баробар ошди. Қўшма корхона ва лойиҳалар сони икки баробар кўпайди. Италиянинг етакчи компаниялари билан металлургия, электротехника, қишлоқ хўжалиги, чорвачилик, туризм ва бошқа соҳаларда ўзаро манфаатли кооперация йўлга қўйилган.

Ўзбекистон делегацияси Венециядаги биенналеда фаол иштирок этди, Флоренсияда кўргазма ўтказилди. Ўтган йил декабрь ойида Рим ва Виарежо шаҳарларида Ўзбекистон маданияти кунлари бўлиб ўтди.

Ўзбекистонда Турин ва Пиза университетларининг филиаллари муваффақиятли фаолият юритмоқда. Апрель ойида ректорларнинг иккинчи форуми самарали ўтди.