Футбол бўйича Ўзбекистон Суперкубоги 27 май, сешанба куни бўлиб ўтди.
Унда Қаршининг “Насаф” клуби Андижоннинг “Андижон”и билан ўйин ўтказди. Тошкентдаги “Бунёдкор” стадионида ўтказилган баҳс ёмғир остида кечди.
Ҳар икки жамоа ҳам ўйин давомида эҳтиёткорлик билан ҳаракат қилди. Гарчи "голлар шоуси" кутилган бўлса-да, жамоалар натижага кўпроқ эътибор қаратди. Баҳс тақдирини эса биргина пенальти ҳал қилди. Захирадан ўйинга қўшилганига бир неча дақиқа бўлган Шерзод Насруллаев пенальти ишлади. Уни Ҳусайн Норчаев аниқ амалга оширди.
Ушбу ҳисоб ўйин якунига қадар сақланиб қолди. Қаршиликлар кетма-кет иккинчи марта Ўзбекистон Суперкубоги ғолибига айланди.
Изоҳ (0)