Франциянинг Канн шаҳрида кенг кўламли электр узилиши юз берди, Денгизбўйи Алп департаментининг бутун ғарбий қисми электр таъминотисиз қолди. Ҳудудда интернет, мобил алоқа ишламаяпти, лифтлар ва светофорлар ўчган. Темирйўл қатнови бузилган, юзлаб одамлар вокзалда тиқилиб қолган. Бу ҳақда Franceinfo радиостанцияси хабар берди.
24 май куни Лазур қирғоғида 78-Канн кинофестивали якунланмоқда. Асосий танлов ғолибини эълон қилишдан олдин сўнгги фильм намойишлари бўлиб ўтиши белгиланган. Тадбирга кирмоқчи бўлганлар интернет алоқаси йўқлиги сабабли чипталарни кўрсатишда қийинчиликка дуч келмоқда.
Танловда 20 га яқин фильм иштирок этмоқда. Хусусан, фестиваллар ва конгресслар саройида франко-испан режиссёри Оливер Лашенинг “Сират” фильми намойиши тўхтатилди.
Бундай ҳолат 1966 йилда ҳам содир бўлган. Ўшанда электр таъминоти узилиши туфайли Клод Лелушнинг “Эркак ва аёл” фильми намойиши тўхтаб қолган. Бу фильм кейинчалик бош мукофот — “Олтин палма япроғи”ни қўлга киритган эди.
“Эрталаб соат 10 дан бошлаб электр таъминотидаги узилиш Канн ва унинг атрофидаги шаҳарчаларга таъсир кўрсатди, натижада 160 минг хонадон электрсиз қолди”, дейилади РТЕ энергия тармоқлари оператори хабарида.
Таъкидланишича, энергетиклар электр таъминотини иложи борича тезроқ тиклашга ҳаракат қилмоқда.
Операторнинг маълум қилишича, электрнинг ўчиши бир қатор авариялар натижасида юз берган. Дастлаб Канн ҳудудидаги электр подстанциясида ёнғин чиққан, сўнгра шаҳар яқинидаги юқори кучланишли электр узатиш линияси устуни қулаб тушган.
“Канн ва Денгизбўйи Алп тоғлари ғарбидаги йирик электр узилишига жиноятчилар сабаб бўлган”, дейилади хабарда.
Бундан олдин Испанияда ҳам интернет ва мобил алоқа оммавий равишда ишламай қолган эди.
Изоҳ (0)