Fransiyaning Kann shahrida keng ko‘lamli elektr uzilishi yuz berdi, Dengizbo‘yi Alp departamentining butun g‘arbiy qismi elektr ta’minotisiz qoldi. Hududda internet, mobil aloqa ishlamayapti, liftlar va svetoforlar o‘chgan. Temiryo‘l qatnovi buzilgan, yuzlab odamlar vokzalda tiqilib qolgan. Bu haqda Franceinfo radiostansiyasi xabar berdi.
24-may kuni Lazur qirg‘og‘ida 78-Kann kinofestivali yakunlanmoqda. Asosiy tanlov g‘olibini e’lon qilishdan oldin so‘nggi film namoyishlari bo‘lib o‘tishi belgilangan. Tadbirga kirmoqchi bo‘lganlar internet aloqasi yo‘qligi sababli chiptalarni ko‘rsatishda qiyinchilikka duch kelmoqda.
Tanlovda 20 ga yaqin film ishtirok etmoqda. Xususan, festivallar va kongresslar saroyida franko-ispan rejissyori Oliver Lashening “Sirat” filmi namoyishi to‘xtatildi.
Bunday holat 1966-yilda ham sodir bo‘lgan. O‘shanda elektr ta’minoti uzilishi tufayli Klod Lelushning “Erkak va ayol” filmi namoyishi to‘xtab qolgan. Bu film keyinchalik bosh mukofot — “Oltin palma yaprog‘i”ni qo‘lga kiritgan edi.
“Ertalab soat 10 dan boshlab elektr ta’minotidagi uzilish Kann va uning atrofidagi shaharchalarga ta’sir ko‘rsatdi, natijada 160 ming xonadon elektrsiz qoldi”, deyiladi RTE energiya tarmoqlari operatori xabarida.
Ta’kidlanishicha, energetiklar elektr ta’minotini iloji boricha tezroq tiklashga harakat qilmoqda.
Operatorning ma’lum qilishicha, elektrning o‘chishi bir qator avariyalar natijasida yuz bergan. Dastlab Kann hududidagi elektr podstansiyasida yong‘in chiqqan, so‘ngra shahar yaqinidagi yuqori kuchlanishli elektr uzatish liniyasi ustuni qulab tushgan.
“Kann va Dengizbo‘yi Alp tog‘lari g‘arbidagi yirik elektr uzilishiga jinoyatchilar sabab bo‘lgan”, deyiladi xabarda.
Bundan oldin Ispaniyada ham internet va mobil aloqa ommaviy ravishda ishlamay qolgan edi.
Izoh (0)