Россия зарбаларига учраган Украина инфратузилмасини тиклашда 12 та давлат ёрдам бераётгани маълум қилинди
Россия томонидан Украина шаҳарларининг ўққа тутилишидан сўнг 12 та давлат Украина инфратузилмасини тиклашга ёрдам бермоқда. Бу ҳақда мамлакат ташқи ишлар вазири Дмитрий Кулебага таяниб, «Украина сейчас» хабар берди.
«Биз ҳозирга қадар 12 давлат: Исроил, Испания, Италия, Литва, Германия, Шимолий Македония, Польша, Корея республикаси, Словакия, Словения, Финляндия ва Франция ҳукуматлари ва компаниялари билан ускуналар етказиб бериш бўйича келишиб олдик. Ҳамкорлар доирасини ва қўллаб-қувватлаш ҳажмини ошириш устида ишлашни давом эттирамиз», — деди Дмитрий Кулеба.
Унинг қўшимча қилишича, ушбу мамлакатлар ҳукуматлари ва компаниялари Украина инфратузилмасини тиклаш учун зарур жиҳозларни етказиб бермоқда, уларнинг бир қисми аллақачон келтирилган, қолганлари эса яқин кунларда етказилади.
Россия Украина инфратузилмасига 10 октябрдан буён зарбалар бермоқда. Бундай зарбалар Қрим кўпригидаги портлашдан кейин бошланган, портлашни эса, Россия ҳукумати фикрича, Украина махсус хизматлари уюштирган. Россия Мудофаа вазирлиги зарбалар нишони ҳарбий бошқарув тизими, алоқа ва энергетика объектлари эканини айтди.
Украина энергетика инфратузилмасининг қарийб 40 фоизига зарар етди, деганди мамлакат энергетика вазири маслаҳатчиси Александр Харченко. Киевда номаълум муддатга электр токини шошилинч ўчириш жорий қилинди. Шаҳар ҳукумати «тўлиқ блекаут» юз бериши, энг ёмон ҳолатда эса иссиқлик таъминоти ўчишини истисно қилмаяпти.
31 октябрь куни эрталаб ҳам Украина шаҳарларида, хусусан Киевда кетма-кет портлашлар содир бўлди ва бутун мамлакат ҳудудида ҳаво тревогаси эълон қилинди. Муҳим инфратузилма объектларига зарбалар берилган.
