Мирзаобод туманида Халқ депутатлари туман кенгашининг навбатдан ташқари сессияси ўтказилди. Бу ҳақда Сирдарё вилояти ҳокимлиги хабар берди.
Унда Абдураҳим Умаров Мирзаобод тумани ҳокими лавозимига тасдиқланди.
Мазкур тайинловга қадар у вилоят ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари – иқтисодиёт ва молия бош бошқармаси бошлиғи лавозимида фаолият юритган.
Аввалроқ Сирдарё вилояти ҳокимига қишлоқ ва сув хўжалиги ҳамда молия-иқтисодиёт ва камбағалликни қисқартириш масалалари бўйича ўринбосарлар тайинланганди.
Алишер Хидиров 4 февралдан Сирдарё вилояти ҳокимининг қурилиш, тўсиқларсиз муҳит яратиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари этиб тайинланган эди.
2025 йил 16 январь куни президент раислигида бўлиб ўтган йиғилишда Сирдарё вилояти ҳокими Акмалжон Маҳмудалиев лавозимидан озод этилганди. Бунга ҳудудида инвестицияларни жалб қилиш, қишлоқ хўжалигини ривожлантириш ва бошқа йўналишлардаги фаолиятда жиддий камчиликларга йўл қўйгани сабаб бўлди.
Унинг ўрнига 2018 йил июлдан буён Самарқанд вилояти ҳокими лавозимида ишлаб келган Эркинжон Турдимов Сирдарё вилояти ҳокими вазифасини бажарувчи этиб тайинланди.
Изоҳ (0)