“Балки, бу ҳаётимдаги энг катта хатомдир” — бир оилани бузишда айбланган, ҳамкасбидан ранжиган ва оғир дардни енгиб ўтган Феруза Каримова (фото, видео)

“Дастингдан” қўшиғи билан танилган хонанда Феруза Каримованинг нафақат ижоди, балки шахсий ҳаёти ҳам кўплаб муҳокамаларга сабаб бўлади. Бир неча йиллик танаффусдан кейин у яна ижодга қайтди. Энг қизиғи, ижодга қайтиш жараёни ҳам кўплаб муҳокамаларга сабаб бўлди.

“Санъаткорлар оиласида туғилганман”

Хонанда ҳеч қаерда таҳсил олмагани ва санъаткорлар оиласида таҳсил олгани ҳақида айтиб ўтган.

— Қўшиқчилик бўйича ҳеч қаерда таҳсил олмаганман. Аммо оиламизда санъаткорлар бор, иккита бувим ҳам ҳалфачилик билан шуғулланишган. Болалигимда бувиларим билан бирга аёллар даврасида қўшиқ куйлаганимизни жуда яхши эслайман. Ундан кейин спортга меҳр қўйдим. Сузиш ва енгил атлетика билан шуғулландим. Бир нечта чемпионатларда ғолиб бўлганлигим билан мақтана оламан. Аммо санъатга бўлган қизиқишим устунлик қилди. Лекин ўша вақтда институтда ўқишга имконим бўлмади, дейди хонанда.

“Продюссеримга турмушга чиқдим”

Хонанда ўзидан 12 ёш катта инсон Бахтиёр Фаттаҳов билан қандай танишгани ва оила қуриш тарихини қуйидагича эслайди.

— 2014 йил турмуш ўртоғим билан кўришиб қолиб, 2015 йил ижод бошланди. 2016 йил “Дастингдан” қўшиғим чиқди. Кейин уларда менга нисбатан илиқлик пайдо бўлган. Лекин мен эътибор бермаганман. Продюсерми продюсер, ишми иш, бўлган у пайтда. Улар ўша пайтда биринчи оиласидан ажрашган бўлган. Иш пайтида биз билан кўришиб турардилар, суҳбатлашардилар. Қарасам, яхши инсон, меҳрибон, менга эътиборли. Ҳаёти ҳақида ҳам гапириб берардилар. Мени секин-секин кўниктириб, ўзига ўргатиб, топ этиб, узук олиб келиб, қараб турибдилар: “Менга турмушга чиқасизми?” деб. Бир йил ишладим, характерларини кўрдим, мендаям уларга нисбатан меҳр пайдо бўлди. Турмуш ўртоғимни яхши кўраман, ҳурмат қиламан. Ҳар доим ҳар тарафлама қўллаб-қувватлаб келганлар, дейди Феруза Каримова.

“У оиланинг бузилишига дахлим йўқ”

Хонанда продюсерига турмушга чиқишдан олдин ҳаёлидан қандай ўйлар ўтгани ҳақида ҳам сўзлаб берган.

— Хаёлимдан кўп нарса ўтди. Мен турмушга чиқмаганман, қиз бола бошим билан ижод бошлаганман. Улар мендан 12 ёшга катта. Менинг биринчи турмушим, уларнинг эса иккинчи турмушлари. Асосий қийнаган нарса шу бўлган. Озми, кўпми ижод қилиб қўйдим. Мухлисларим кўнглидан озгина бўлса ҳам жой олдик. Мен ҳақимда мухлислар қандай фикр билдириши мумкин. Ўзидан каттага тегибди ёки... Кўп нарса эшитдимда, тўғриси. Оиласини ажратиб юборибди, ўз фарзандларини ҳам ташлаб, шу қизга уйланибди. Хотинини ташлаб кетибди шу қизни деб, деган жуда кўп гапларни эшитдик, у инсонлардан кўнглим оғриди. Лекин санъаткор кўзи кўр, қулоғи кар бўлиши керакда. Худо бор, бир куни ҳаммаси ўртага чиқади, ўшанда билишади, дедим. Менинг ҳеч қанақа дахлим бўлмаган. Фақат ўйлаганманки, кейинги ҳаётим нима бўлади, орамиздаги фарқни ўйлаганман, ижодни ҳам ўйлаганман. Қарасам, соҳани тушунадилар, санъатни севадилар, бошқача назар билан қарамайдилар. Майли, Аллоҳга таваккал, деб турмушга чиққанман. Лекин меҳрим бўлган, дейди хонанда.

“Онам жиддий қаршилик қилган”

Феруза Каримова онаси ва яқинлари томонидан қаршиликлар бўлганини ҳам яширмади.

— Турмушга чиқаётганимда онам жиддий қаршилик қилган. “Тенгинг топилади”, дейишган, тенгим топилган. У менга эрлик қила олмасди. Менинг ҳисобимга яшарди. Мени уларнинг ўтмиши қизиқтирмайди. Менга уларнинг мени деб яшай бошлаганларидан кейинги ҳаёти қизиқ. Мен ўзим тенги болага турмушга чиқиб, бир ой яшаб, бир-биримизни тушунмай ажрашиб кетиб, “Ана, номига турмушга чиқиб олди. Санъаткорда, битта болани бахтсиз қилди”, дегандан, иккинчи марта уйланаётган каттароқ ёшли инсонни бахтли қилганим яхшироқ. Одамларнинг гапи, майли. Мен ҳеч кимга жавоб бермайман. Аллоҳга жавоб бераман фақат, дейди хонанда.

“Мен санъатни тарк этаман”

2021 йили хонанда берган интервьюларининг бирида санъатни тарк этиши ҳақида айтиб ўтганди. Аммо орадан уч йил ўтиб, нотўғри қарор қабул қилгани ҳақида гапирди.

— Турмуш ўртоғим билан Умра сафарига боргач, санъатдан кетиш ҳақида қарор қилгандим. Ҳижобга кирдим, тўй-ҳашамларга, концертларга умуман бормай қўйдим. Аммо бу ҳаёт мен учун эмас экан. Анча сиқилиб қолдим. Рўмолимни муҳокама қилаётганларга айтиб ўтмоқчиман. Мен рўмолга доғ туширадиган иш қилганим йўқ. Ҳижобни ечишим мен ва Аллоҳ ўртасидаги масала, бунда бошқаларнинг аралашишга ҳаққи йўқ. Ичимдан нима ўтганини ўзим биламан.Мен ижодсиз, мухлислар олқишисиз яшай олмас эканман, деди хонанда.

“Ўзимдан ўтгани ўзимга аён”

Хонанда оғир касалликка чалингани, сочлари тўкилиб, кўп вазн ташлагани ҳақида гапирди.

— Бир инсоннинг ҳаётини билмай туриб, уни танқид қилиш осон. Мен ҳам ўзимдан ўтганини ўзим биламан. Рўмолни ечганим балки ҳаётимдаги энг катта хатомдир, бундан кўп афсусланаман. Уйда сиқилиб қолдим, касалликка чалиндим. Бу ҳолат турмуш ўртоғим ва фарзандларим ўртасидаги муносабатимизга ҳам таъсир этди. Касалликка чалиниб, бирдан сочларим тўкилиб кетди, оқ тушди. Кўп вазн ташлаб, ўзимга ўхшамай қолдим. Охири турмуш ўртоғим ҳам қароримни қўллаб-қувватлади. Рўмолни ечишим айримлар ўйлаганидек осон кечгани йўқ, дейди хонанда.

“Мен ранжидим”

Хонанда “Ой бор қизим” қўшиғи туфайли ҳамкасби билан жиддий келишмовчиликка боргани ҳақида сўзлаб берди.

— Агар сўраб, розилигимизни олиб қўшиғимни ижро этишса қарши бўлмайман. Чунки қўшиқ учун маблағ сарфлаганмиз, меҳнат қилганмиз. Шерзод Эргашев қўшиқни айтаётгани ҳақида эшитдим, майли, ўша қўшиқ орқали озми-кўпми маблағ ҳам топгандир. Аммо концертда ҳеч қандай ўзгартиришсиз ижро этиб, бирор ерида қўшиқ эгасини айтиб ўтмаганини ҳеч қанақасига оқлаб бўлмайди. Буни эшитиб жуда ранжидим. Турмуш ўртоғимга айтсам, “Майли, эркакларнинг ишига аралашманг, ўзим гаплашаман”, деди. Ҳозир муаллифлик ҳуқуқини ҳимоя қилиш бўйича шуғулланишяпти, дейди хонанда.

Дарвоқе, хонанда турмуш ўртоғи продюсерлик қилган сериалларда ҳам суратга тушган.