Олимпиадага 100 кун қолди: Ўзбекистон Марказий Осиё давлатлари орасида қўлга киритилган йўлланмалар сони бўйича ҳозирча 2-ўринда бормоқда

Жорий йилнинг 5–21 август кунлари Бразилиянинг Рио-де–Жанейро шаҳрида тўрт йилликнинг энг нуфузли турнири бўлиб ўтади. Ушбу мусобақанинг бошланишига бугун, 27 апрель санасида роппа-роса 100 кун қолди. 2016 йилнинг 26 апрель ҳолатига кўра, ўзбекистонлик спортчилар томонидан Олимпиада ўйинларига 10 та спорт туридан жами 46 та йўлланма қўлга киритилди. «Дарё» нашри Ўзбекистон Рио–2016 Олимпиада ўйинларига қўлга киритилган йўлланмалар сони бўйича Марказий Осиё давлатлари ўртасида нечанчи ўринда бораётганини аниқлади.

Марказий Осиё давлатлари орасида Рио–2016 ўйинларига энг кўп йўлланмани Қозоғистон қўлга киритган. Қозоғистон Миллий олимпия қўмитаси матбуот хизматининг маълум қилишича, 26 апрель ҳолатига кўра, қозоғистонлик спортчилар томонидан Олимпиада ўйинларига 22 спорт туридан 81 та йўлланма қўлга киритилган.

Шунингдек, Wikipedia’даги маълумотлар бўйича 26 апрель ҳолатига кўра, Қирғизистон Рио–2016 Олимпиадасига 3 та спорт тури бўйича 9 та, Тожикистон 1 та спорт турида 1 та йўлланма олган. Туркманистон ва Афғонистон вакиллари Рио–2016 Олимпиадасига йўлланмани қўлга киритмаган.

Қуйида XXXI ёзги Олимпиада ўйинларига йўлланма олган ўзбекистонлик спортчилар рўйхати келтирилган.

Бокс – 11 та

• Ҳасанбой Дўсматов (-49 кг)
• Шаҳобиддин Зоиров (-52 кг)
• Муроджон Ахмадалиев (-56 кг)
• Хуршид Тожибоев (-60 кг) / Элнур Абдураимов (-60 кг)*
• Фазлиддин Ғоипназаров (-64 кг)
• Шахрам Гиясов (-69 кг)
• Бектемир Мелиқўзиев (-75 кг)
• Элшод Расулов (-81 кг)
• Рустам Тўлаганов (-91 кг)
• Баҳодир Жалолов (+91 кг)
• Ёдгорой Мирзаева (-51 кг)

*Қоидага кўра, Олимпиада ўйинларида ҳар бир вазн тоифасида бир давлатдан фақатгина бир нафар спортчи иштирок этиши мумкин. Шунинг учун, Рио–2016 Олимпиадасида қайси спортчи иштирок этиши ўйинлар арафасида Ўзбекистон бокс федерацияси томонидан эълон қилинади.

Гимнастика – 4 та

Спорт гимнастикаси

• Оксана Чусовитина
• Антон Фокин

Трамполин

• Екатерина Хилько

Бадиий гимнастика

• Анастасия Сердюкова – яккалик
• Самира Амирова, Валерия Давидова, Луиза Ганиева, Зарина Қурбонова, Марта Растобурова – жамоавий

Енгил атлетика – 8 та

• Ситора Ҳамидова – марафон (42 195 м)
• Ситора Ҳамидова – марафон (10 000 м)
• Светлана Радзивил – баландликка сакраш
• Сухроб Хўжаев – босқон улоқтириш
• Марина Хмелевская – марафон (42 195 м)
• Бобур Шокиржонов – найза улоқтириш
• Екатерина Воронина – еттикураш
• Андрей Петров – марафон (42 195 м)

Спорт курашлари – 6 та

Юнон-рум кураши

• Елмурат Тасмурадов (-59 кг)
• Рустам Ассакалов (-85 кг)
• Дилшод Турдиев (- 75 кг)
• Мўминжон Абдуллаев (-130 кг)

Эркин кураш

• Ихтиёр Наврўзов (-65 кг)
• Магомед Ибрагимов (-97 кг)

Байдарка ва каноэда эшкак эшиш – 4 та

• Алексей Мачалов – 1000 м яккалик (байдарка)
• Герасим Кочнев – 1000 м яккалик (каноэ)
• Ольга Умаралиева – 200 м яккалик (байдарка)
• Вадим Меньков/Серик Мирбеков – 1000 м жуфтлик (каноэ)

Оғир атлетика – 5 та

Оғир атлетика спорт турида йўлланмалар жамоаларга берилади. Олимпиада ўйинларида иштирок этадиган спортчилар Ўзбекистон оғир атлетика федерацияси томонидан мусобақалар арафасида эълон қилинади. Спортчилар рўйхати 20 июнга қадар тақдим этилиши керак.

Таэквондо (WTF) – 3 та

• Дмитрий Шокин (+80 кг) / Жасур Бойқўзиев (+80 кг)**
• Никита Рафалович (-80 кг)
• Нигора Турсунқулова (-67 кг)

**2015 йил якунларига кўра, олимпия рейтингининг энг оғир вазндаги спортчилари жадвалида бир йўла икки нафар ўзбекистонлик спортчи Дмитрий Шокин ва Жасур Бойқўзиев кучли олтиликдан ўрин эгаллади. Қоидага кўра, Олимпиада ўйинларида ҳар бир вазн тоифасида бир давлатдан фақатгина бир нафар спортчи иштирок этиши мумкин. Шу боис, Рио—2016 Олимпиада ўйинларида қайси спортчи иштирок этиши ўйинлар арафасида Ўзбекистон Таэквондо (WTF) миллий ассоциацияси томонидан эълон қилинади.

Сузиш – 2 та

• Раънохон Аманова – 200 метр комплекс
• Раънохон Аманова – 400 метр комплекс

Стол тенниси – 1 та

• Зоҳид Кенжаев

Академик эшкак эшиш – 1 та

• Шаҳбоз Холмирзаев

Қайд этиш жоиз, қўлга киритилган 46 та Олимпиада йўлланмалари бўйича 49 нафар ўзбекистонлик спортчи Рио—2016 Олимпиадасида иштирок этади. Ситора Ҳамидова (енгил атлетика) ва Раънохон Аманова (сузиш) иккитадан йўлланмага эга. Байдарка ва каноэда эшкак эшиш ҳамда Бадиий гимнастика спорт турларида ўзбекистонлик спортчилар жамоавий баҳсларда қатнашади.

Маълумот ўрнида, 26 апрель ҳолатига кўра, 7—18 сентябрда ўтказиладиган XV ёзги Паралимпия ўйинларига ўзбекистонлик спортчилар томонидан қуйидаги спорт турлари бўйича 25 та йўлланма қўлга киритилган.

Енгил атлетика – 10 та

Дзюдо – 8 та

Сузиш – 5 та

Ўқ отиш – 1 та

Пауэрлифтинг – 1 та