“Тошкент ёшларни севади” ойлигида ўтказилган танловлар ғолиблари ва йил бўйи ёшлар билан фаол ишлаганлар тақдирланди

Тошкент шаҳар ҳокимлиги ва Ёшлар ишлари агентлиги Тошкент шаҳар бошқармаси ташаббуси билан 15 ноябрдан 15 декабргача ўтказилган “Тошкент ёшларни севади” ойлиги доирасида 57 та йирик танловлар, учрашувлар, ўқувлар, меҳнат ярмаркалари ва бошқа лойиҳалар ташкил этилиб, 250 мингдан ортиқ ёшлар қамраб олинди.

Дастлаб ойлик “Пойтахтнинг SMMчи қизлари” мавзусида маҳорат дарси билан старт олди. Қисқа вақт ичида кам таъминланган ва ишсиз қизларни касбга ўргатиш мақсадида “Аёллар дафтари”, “Ёшлар дафтари” ва “Темир дафтар”га киритилган 500 нафар хотин-қизлар 2 ойлик SMM мутахассислигига бепул ўқитилди.

Шунингдек, ойлик доирасида табиатни асраш, унга ҳар бир фуқаронинг дахлдорлик ҳиссини ошириш, ўқувчи ва талабаларнинг экологик маданиятини юксалтириш мақсадида “Янги Ўзбекистон” боғида “Яшил шаҳар” экологик акцияси ўтказилди. Акция давомида боғ ҳудудида  таниқли шахслар ва волонтёрлар иштирокида 300 туп чинор кўчати экилди. Шунингдек, акция доирасида умумтаълим мактаб ўқувчилари ўртасида “Табиат учун ғамхўрмиз” шиори остида расмлар танлови ташкил этилди.

Ёшларни соғлом турмуш тарзига жалб қилиш, спортга бўлган қизиқишларини ошириш мақсадида Олий таълим муассасалари талабалари ўртасида “Беш ташаббус олимпиадаси” доирасида спортнинг волейбол, енгил атлетика, шашка ва стол тенниси, стритболл, мини футбол каби турлари бўйича мусобақалар ташкил этилди.

Илк маротаба Тошкент шаҳар Болалар ташкилотининг I конференцияси ўтказилиб, болалар ташкилотининг келгусидаги ишлари режаси тасдиқланди. Тошкент шаҳар ҳокимлиги ташаббуси билан бир гуруҳ талаба-ёшларнинг таклифлари инобатга олган ҳолда Тошкент талабалар ассосиациясининг биринчи таъсис йиғилиши ўтказилди.  Тошкент шаҳридаги волонтёрлик гуруҳи раҳбарлари, ёшлар етакчилари, турли йўналишларда фаолият олиб борадиган 600 нафар фаол волонтёрлар иштирокида Волонтёрлар форуми ўтказилди.

Бундан ташқари, пойтахтда илк маротаба 300 дан ортиқ мактаблар, 50 дан ортиқ профессионал таълим муассасалари, 90 дан ортиқ олий таълим муассасаларида таҳсил олаётган ёш ўқитувчилар, олимлар, тадқиқотчилар ҳамда таянч докторантлардан иборат 500 нафардан зиёд илм эгалари бир платформада жам бўлишди. Тошкент шаҳар Ёш ўқитувчи ва олимлар кенгашининг I таъсис йиғилиши айнан илм эгалари учун фикр алмашиш майдони бўлди. Келгуси иш режалар муҳокама қилиниб, “Ёш ўқитувчи ва олимлар Кенгаши” бошқаруви раиси сайланди.

Олий таълим муассасаларининг 50 000 нафар талабалари учун соҳанинг етук мутахассислари иштирокида очиқ мулоқот форуми ўтказилди. “Заковат арена” биносида ўтказилган соҳалар кесимидаги очиқ мулоқотларда ёшлар ўзини қизиқтирган барча саволларига мутахассаислардан тўғридан тўғри жавоб олиш имконияни берди.

18 ноябрь Ўзбекистон Давлат байроғининг қабул қилинганига 33 йил тўлиши муносабати билан “Ёшлик” талабалар шаҳарчасида ёшларни ҳарбий-ватанпарварлик руҳида тарбиялашга қаратилган маданий тадбирлар, парадлар, жанговар кўргазмали чиқишлар намойиш этилди. 

“Тошкент ёшларни севади” ойлиги доирасида ноябрь ойи давомида Тошкент шаҳрида жойлашган 325 та умумтаълим мактабларида ҳамда барча туманларида “Болалар ҳаракати” сардорлар сайлови ўтказилди. 30 ноябрь куни Ёшлар марказида “Юксак мақсадлар сари бирлашайлик!” шиори остида Тошкент шаҳар сардорларининг I форуми бўлиб ўтди. Унда 6 та йўналиш бўйича Тошкент шаҳар сардорлари ва бош сардори сайланди.

Иқтидорли болаларни аниқлаш, уларни ҳар томонлама қўллаб-қувватлаш, уларнинг истеъдод ва маҳоратларини намоён қилишлари учун имконият яратиш мақсадида ҳар йили анъанавий тарзда ўтказиш мақсадида илк маротаба “Орзу” болалар ижодиёти фестивали ташкил этилди. Унда 2153 нафар бола рўйхатдан ўтказилди. Фестивалда 6 ёшдан 14 ёшгача бўлган болалар уч ёш тоифасида (6–8 ёш, 9–11 ёш ва 12–14 ёш) иштирок этди. Улар вокал, адабиёт, классика, рақс, чолғу, тасвирий ва амалий санъат каби 6  йўналишнинг бирида ўз иқтидорларини намойиш этди.

Ушбу ойлик доирасида 9—13 декабрь кунлари умумтаълим мактабларининг 36 минг нафар бошланғич синф ўқувчилари учун бепул концерт-шоулар ташкил этилди.

“Алпомиш” муз саройида йирик ташкилотлар иштирокида олий таълим муассасалари битирувчи талабалари учун “Келажак Expo” ҳамда мутахассислик талаб этилмайдиган касблар бўйича “Дипломсиз иш” меҳнат ярмаркалари,  “ТОП 100 та олий ўқув юрти” – Тошкент шаҳридаги олий таълим муассасаларининг тарғибот кўргазмалари, ота-оналар ва ўқувчилар учун ўқув-марказлари форуми ўтказилди.

“Тошкент ёшларни севади” ойлиги якунида ташкил қилинган гала-концертда ойлик доирасида ўтказилган танловларда ва йил давомида Тошкент шаҳрида ёшлар билан фаол ишлаган ва ёшларга оид давлат сиёсатини юритишда жонбозлик кўрсатган бир гуруҳ ёшлар етакчилари, шунингдек, “Орзу” болалар ижодиёти кўрик-танлови ғолиблари ҳамда SMM курсининг илк 500 нафар битирувчилари ташкилотчилар томонидан тақдирланди.

Хусусан, бепул SMM курси битирувчилари учун мобилография йўналишида “Энг яхши ижодий иш” кўрик-танлови ўтказилиб, 10 та энг сара видео муаллифлари ғолиб деб топилди ва Тошкент шаҳар ҳокимлиги томонидан Ипҳоне 16 телефони билан рағбатлантирилди. 200 нафар фаол ёшлар етакчиларига эса хорижга саёҳат, дам олиш масканларига йўлланма, компьютер каби совғалар тақдим қилинди. “Орзу” болалар ижодиёти кўрик-танловининг адабиёт, классика, рақс, чолғу, тасвирий ва амалий санъат йўналиши ғолиблари диплом, статуетка ва планшет билан тақдриланди.