Фотогалерея: Дунёнинг турли мамлакатларида Рио–2016 олимпиячилари қандай кутиб олинди?

Бразилиянинг Рио-де-Жанейро шаҳрида 5–21 август кунлари бўлиб ўтган XXXI ёзги Олимпия ўйинларида иштирок этган ўзбекистонлик спортчилар кеча, 23 август куни Тошкент шаҳрига етиб келди. Тошкент халқаро аэропортида ушбу нуфузли мусобақа ғолиблари, совриндорлари ва иштирокчилари тантанали кутиб олинди.

«Дарё» дунёнинг турли мамлакатларида олимпиячилар қандай кутиб олганлиги билан қизиқди ва махсус фотогалерея тайёрлади.

Ўзбекистон

Спортчилар сони: 70 таМедаллар сони: 13 та (4 та олтин – 2 та кумуш – 7 та бронза)Медаллар рейтингидаги ўрни: 21

Ўзбекистон олимпия терма жамоаси Рио–2016 Олимпиадасида жами 13 та медални қўлга киритиб, тарихда илк марта дунёда 21, Осиёда 4, МДҲда 2, Марказий Осиёда 1-ўринни эгаллади. Қайд этиш жоиз, Ўзбекистон бокс терма жамоаси Рио—2016 Олимпиадасида тарихда биринчи бор 1-ўринни қўлга киритди.

АҚШ

Спортчилар сони: 555Медаллар сони: 121 та (46–37–38)Медаллар рейтингидаги ўрни: 1

Энг кўп спортчи билан Рио–2016 Олимпиадасида иштирок этган АҚШ терма жамоаси аъзолари ўз спорт туридаги баҳслари якунига етгач мамлакатга қайтган. Жумладан, бокс бўйича -49 килограмм вазн тоифасида ярим финалда ўзбекистонлик Ҳасанбой Дўстматовдан енгилган ва бронза медалига сазовор бўлган Нико Эрнандес Wichita Dwight Eisenhower халқаро аэропортида кутиб олинди. Шунингдек, АҚШ гимнастика аёллар терма жамоаси мамлакатга етиб келгач, Жимми Феллоннинг тунги шоусига таклиф этилди.

Буюк Британия

Спортчилар сони: 372Медаллар сони: 67 та (27–23–17)Медаллар рейтингидаги ўрни: 2

Буюк Британия Рио–2016 Олимпия ўйинларида кўпчилик мухлис ва мутахассисларни ҳайратлантирди. АҚШ терма жамоасидан кейин британияликлар медаллар рейтингида иккинчи ўринни эгаллади. Бу йилги Олимпиада совриндорлари Хитроу аэропортида, асосан журналистлар томонидан кутиб олинди.

Хитой

Спортчилар сони: 416Медаллар сони: 70 та (26–18–26)Медаллар рейтингидаги ўрни: 3

Рио–2016 Олимпиадаси хитойликлар учун кутилганидек ўтмади. Медаллар рейтингида 3-ўринни эгаллаган Хитой терма жамоаси аъзолари Риода бир неча бор муаммоларга дуч келди. Мукофотлаш маросимларининг бир нечтасида хитойлик спортчилар шарафига нотўғри байроқлар кўтарилган эди, уларда кичик юлдузлар ярим доира шаклида эмас, параллел тарзда жойлашган эди. Хитойлик спортчилар юқори дабдаба билан кутиб олинмаган бўлса-да, Шанхайдаги бинолардан бирида улар шарафига «Хитой» дея ёзув ёзилди.

Россия

Спортчилар сони: 279Медаллар сони: 56 та (19–18–19)Медаллар рейтингидаги ўрни: 4

Россия оғир атлетика ва енгил атлетика федерациялари Рио–2016 Олимпиадасидан четлаштирилган бўлишига қарамай, Россия олимпия термаси 279 спортчи билан иштирок этди ва жами 56 та медалга сазовор бўлди.

Германия

Спортчилар сони: 425Медаллар сони: 42 та (17–10–15)Медаллар рейтингидаги ўрни: 5

Германия терма жамоаси сўнгги 20 йил ичида Олимпиада ўйинларида энг яхши натижасини қайд этди. Спортчиларни мамлакат президенти Йоахим Гаук ҳамда ички ишлар вазири Томас де Мезьер кутиб олди.

Япония

Спортчилар сони: 336Медаллар сони: 41 та (12–6–21)Медаллар рейтингидаги ўрни: 6

Япония олимпия термасини кутиб олиш маросимида асосий эътибор Рио–2016 дан қабул қилиб олинган Олимпиада байроғига қаратилди. Токио 2020 йилда бўлиб ўтадиган Олимпия ўйинларига мезбонлик қилади.

Франция

Спортчилар сони: 397Медаллар сони: 42 та (10–18–14)Медаллар рейтингидаги ўрни: 7

Франция терма жамоаси аъзолари Елисей саройида кутиб олинди. Дзюдо бўйича икки карра Олимпиада (Лондон–2012 ва Рио–2016) чемпиони Тедди Ринер мамлакат байроғини паралимпиячи Микаэл Жеремиасга топширди. Катта эҳтимол билан айнан франциялик теннисчи Паралимпия ўйинларининг очилиш маросимида Франция байроғини кўтаради.

Жанубий Корея

Спортчилар сони: 203Медаллар сони: 21 та (9–3–9)Медаллар рейтингидаги ўрни: 8

Жанубий Корея Рио–2016 даги Олимпиада натижаларига кўра медаллар рейтингида Осиёда Япониядан кейин иккинчи ўринни эгаллади.

Канада

Спортчилар сони: 312Медаллар сони: 22 та (4–3–15)Медаллар рейтингидаги ўрни: 20

Шимолий Америка қитъаси вакили Канадани кутиб олиш маросими оддийгина ўтди.

Қозоғистон

Спортчилар сони: 104Медаллар сони: 17 та (3–5–9)Медаллар рейтингидаги ўрни: 22Қозоғистон терма жамоасини кутиб олиш маросимида Рио–2016 Олимпиадаси бокс мусобақаларининг -69 килограмм вазн тоифасида чемпион бўлган Данияр Елеусиновга айниқса катта эътибор қаратилди. Айнан Елеусинов финал баҳсида ўзбекистонлик Шаҳрам Ғиёсовни мағлубиятга учратганди.

• Қозоғистон матбуоти: Ўзбекистон сўнгги паллада мамлакатимиздан ўзиб кетди

Колумбия

Спортчилар сони: 144Медаллар сони: 8 та (3–2–3)Медаллар рейтингидаги ўрни: 23

144 нафар спортчи билан Риога ташриф буюрган Колумбия терма жамоаси жами 8 та медаль тўплади ва медаллар рейтингида 23-поғонадан жой олди. Колумбияликларнинг муваффақияти мамлакатда катта байрам сифатида қарши олинди.

Венесуэла

Спортчилар сони: 86Медаллар сони: 3 та (0–1–2)Медаллар рейтингидаги ўрни: 65

Венесуэла олимпия терма жамоаси аъзолари мамлакат президенти Николас Мадуро томонидан кутиб олинди. Рио–2016 Олимпиадасининг бокс бўйича -52 килограмм вазн тоифасида бронза медалига сазовор бўлган Йоэл Ривас ўз ютуғини президентга ҳадя қилди. Қайд этиш жоиз, ярим финалда венесуэлалик боксчи кейинчалик Олимпиада чемпионига айланган ўзбекистонлик Шаҳобиддин Зоировга имкониятни бой берганди.

Сингапур

Спортчилар сони: 25Медаллар сони: 1 та (1–0–0)Медаллар рейтингидаги ўрни: 54

25 нафар спортчи билан Рио–2016 да иштирок этган Сингапур терма жамоасига ягона – олтин медални сузувчи Жосеф Скулинг тақдим қилди. Бу Сингапур тарихидаги илк олтин медаль эди. Скулинг 100 метр масофага баттерфляй усулида сузишда ўз кумири ҳисобланган америкалик сузувчи, 23 карра Олимпиада чемпиони Майкл Фелпсни ортда қолдириб, Рио–2016 да олтин медаллари сонини 6 тага етказиш имкониятидан маҳрум қилганди. Сингапурда сузувчи катта тантана билан кутиб олинди.

Фижи

Спортчилар сони: 51Медаллар сони: 1 та (1–0–0)Медаллар рейтингидаги ўрни: 54

Регби-7 бўйича Фижи эркаклар терма жамоаси Рио–2016 Олимпиада ўйинларида олтин медални қўлга киритди. Бу Фижи тарихидаги илк олтин медаль бўлгани сабабли регби термаси финалда ғалаба қозонган кун давлат байрами сифатида нишонланадиган бўлди. Мамлакат қаҳрамонлари катта стадионда кутиб олинди.

Ҳиндистон

Спортчилар сони: 124Медаллар сони: 2 та (0–1–1)Медаллар рейтингидаги ўрни: 67

Ҳиндистон олимпия термаси Рио–2016 да битта кумуш ва битта бронза медалини тақдим қилди. Бу улар учун катта байрамга айланди.

Қирғизистон

Спортчилар сони: 18Медаллар сони: йўқ

69 килограмм вазн тоифасида чиқиш қилиб, бронза медалини қўлга киритган қирғизистонлик оғир атлетикачи Иззат Ортиқов ўз ватанида катта тантаналар билан кутиб олинган эди. Аммо спортчининг допинг намунасидан тақиқланган стрихнин моддаси топилгач, Қирғизистон Риодаги ягона медалини маҳрум қилинди.