Хабар берганимиздек, бугун, 24 март куни эрта тонгда Тошкентнинг Афросиёб ва Бешёғоч кўчалари кесишмасида (Huma Arena муз сарой олдида) «Наврўз» халқаро ярим марафони старт олган эди.
Дунёнинг 28 мамлакатидан жами 1 500 нафар иштирокчилар икки хил масофа – 5 ва 21,097 кмдан бирини танлаб қатнашиш имкониятига эга бўлди.
Турнирда иштирок этиш хоҳишини билдириб, 1658 нафар иштирокчи рўйхатдан ўтган эди (21 км масофага 610 нафар, 5 км масофага 1048 нафар), уларнинг орасида Австрия, Бельгия, Хитой, Эстония, Франция, Қозоғистон, Қирғизистон, Россия ва бошқа мамлакатларнинг вакилларини кўриш мумкин.
Ярим марафонда Қирғизистонлик Даря Маслова энг яхши натижани қайд этди — 1:12:30. Иккинчи ўрин Ўзбекистонлик Ситора Ҳамидова 1:13:56, учинчи ўрин эса яна бир ҳамюртимиз Екатерина Тунгусковага насиб этди — 1:16:13.
Эркаклар ўртасидаги ярим марафонда биринчи ўринни Хитой вакили Линцян Ян 1:04:43 вақт билан қайд этган бўлса, қирғизистонлик Адилет Киштакбеков 1:05:03 натижа билан иккинчи ўринни, Ўзбекистонлик Андрей Попов эса 1:05:20 билан қўлга киритди.
5 км масофага югуриш мусобақаларида ҳамюртларимиз шоҳсупани мутлақ эгаллади. Азизахон Мирзабекова биринчи (0:19:03), Шоҳсанам Хуррамова иккинчи (0:19:03), Маржона Баратова учинчи (0:19:19) бўлишди.
Эркаклар ўртасида ушбу масофада Отабек Тошқувватов биринчи (0:16:41), Ҳумоюн Маҳмудов иккинчи (0:16:54) ва Хуршид Аҳмадалиев учинчи (0:16:57) ўринларни эгаллди.
Мусобақани Ўзбекистон давлат жисмоний тарбия ва спорт вазирлиги, Тошкент шаҳар ҳокимлиги, Миллий Олимпия қўмитаси, Енгил атлетика федерацияси ва Ёшлар иттифоқи ўзаро ҳамкорликда ташкил этди.
Изоҳ (0)