Жамоанинг 80 фоизи аёллардан иборат араб олимлари гуруҳи Марс орбитасига космик аппаратни чиқарди

БАА томонидан яратилган «Ал-Амал» («Умид») сайёралараро станцияси 9 февраль куни Марс орбитасига муваффақиятли чиқди, деб хабар беради Glamour.

Зонд орбитада икки йил ишлаши ва «Қизил сайёра» атмосферасига оид кўплаб янги маълумотларни йиғиши, хусусан, Марсдаги об-ҳаво сутка давомида қандай ўзгаришини ўрганиши кутилмоқда.

БАА СССР, АҚШ, Хитой ва Европа космик агентлигидан кейин Марсга миссияни муваффақиятли юборишга муваффақ бўлган бешинчи давлатга айланди. Араб жамоасининг 80 фоизи аёллардан иборат бўлиб, уларга БАА Космик агентлиги раҳбари ва мамлакатдаги Юқори технологиялар вазирлиги раиси ҳисобланувчи — 33 ёшли Сара ал-Aмири бошчилик қилмоқда.

Зонд 2020 йилнинг 19 июлида Япония ҳудудидан H-IIA ўрта синфга кирувчи ракета-ташувчи ёрдамида учирилган. Зонднинг орбитага чиқиши 9 февраль куни Тошкент вақти билан соат 20:42 да содир бўлган. Февралда Марсга яна иккита тадқиқот аппарати етиб боради: NASA’нинг «Персеверанс» марсоходи ва Хитойнинг орбитал зондга эга биринчи марсоходи.