Тошкентда бугун, Халқаро иқлим кунида ёшлар ва ҳукуматлар ўртасидаги мулоқот учун самарали халқаро платформага айланадиган Глобал ёшлар фестивали бошланди. Бу ҳақда “Замин” халқаро жамоат фонди хабар берди.
Маълум қилинишича, фестивалда ёш иштирокчилар барқарор ривожланиш ва экологик вазиятни яхшилашга қаратилган инновацион ечимларни таклиф қилади.
“Замин” фонди Васийлик кенгаши раиси Рақамли “яшил” ташаббуслар ҳафталиги очилишида иштирок этиб, у ерда болалар билан биргаликда экологик лойиҳалар ва стартаплар билан танишди, recycle-буюмлар яратиш бўйича маҳорат дарсларида қатнашди.
Зироат Мирзиёева ёш экофаоллар билан суҳбатлашди. Шунингдек фестивалнинг жажжи меҳмонлари билан бирга китоб мутолаа қилди, "Яшил Макон" ва "Бек ва Лола" анимацион мультфильмларини томоша қилди.
Барча хоҳловчилар шу ҳафта охиригача Япон боғида ушбу мультфильмларни томоша қилишлари ва шинам муҳитда китоб ўқишлари мумкин бўлади.
Фестивал ҳар бир ҳафта учун алоҳида тўртта мавзуни қамраб олади ҳамда 15 майдан 30 июнгача Тошкент шаҳри, Қорақалпоғистон Республикаси ва Самарқанд вилоятида бўлиб ўтади.
Кенг кўламли тадбирда 50 дан ортиқ мамлакатдан 300 дан ошиқ халқаро ташкилотлар ҳамда ёшлар тузилмалари вакиллари, мутахассислар, экспертлар ва экоёшлар иштирок этмоқда.
Изоҳ (0)