Хорижий кинокомпаниялар ва киностудияларни мамлакатга жалб этиш мақсадида Тошкент вилоятининг Бўстонлиқ туманида ер майдони 50 гектардан кам бўлмаган замонавий киношаҳар ташкил этиш режалаштирилмоқда. Бу ҳақда 2022–2026 йилларга мўлжалланган тараққиёт стратегиясини 2022 йилда амалга ошириш бўйича «Йўл харитаси» лойиҳасида сўз боради.
Ҳужжат лойиҳасида қайд этилишича, 2022 йилнинг сентябрига қадар киношаҳарларни ташкил қилиш ва фаолиятини йўлга қўйиш бўйича хорижий мутахассислар ва ташкилотларни жалб қилган ҳолда жаҳон тажрибасини ўрганиш ва натижалари бўйича киношаҳар концепциясини ишлаб чиқиш режалаштирилган.
Шунингдек, мамлакатда миллий фильмлар намойиши ва тарғиботини юқори савияда ташкил қилиш, фильмларни оммалаштириш, миллий кинопрокат тармоғини яратиш ҳам кўзда тутилмоқда. Бунда:
- республиканинг ҳар бир туман (шаҳар) кесимида фильмлар намойишини назарда тутувчи «Кинокарвон» фаолиятининг режа жадвалини тасдиқлаш;
- таълим муассасаларида, ҳарбий қисмларда ва иш режими вахта усулида ташкил этилган йирик корхоналарда миллий кино маҳсулотларининг намойишини ташкил этиш;
- республика бўйлаб фильмлар тарғиботини ташкил қилиш ва оммалаштириш бўйича реклама кампаниясини тизимли ташкил қилиш, жаҳон тажрибасини қўллаш;
- мамлакатдаги кинотеатрларни ягона тармоққа улаш, фильмларни онлайн етказиб бериш, намойиш этиш ва ҳисоботини юритиш тизимини жорий этиш кўзда тутилган.
Хусусий анимация студияларини қўллаб-қувватлаш, уларга имтиёзлар бериш ва субсидиялар ажратиш тизимларини амалиётга татбиқ этиш, анимация йўналишида фаолият юритаётган нодавлат ташкилотлар, студиялар ва компанияларга давлат буюртмасини бериш бўйича тизимли ишлар йўлга қўйилади.
Эслатиб ўтамиз, 2021 йилнинг апрелида Ўзбекистон президентининг «Кино санъати ва саноатини янги босқичга олиб чиқиш, соҳани давлат томонидан қўллаб-қувватлаш тизимини янада такомиллаштириш тўғрисида»ги фармони билан кинотеатрлар тармоғини ривожлантириш тартиби тасдиқланган эди. Август ойида Ўзбекистонда йил охиригача умумий қиймати 9,7 миллион доллар хусусий инвестицияларни жалб қилган ҳолда 8 та янги замонавий кинотеатр очилиши маълум бўлганди.
Изоҳ (0)