Сербияда президент Александр Вучич ҳукуматига қарши кенг кўламли норозилик намойишлари бўлиб ўтмоқда. Белград кўчаларига 325 мингга яқин киши чиқиб, коррупцияга қарши курашиш ва мамлакат раҳбариятини алмаштиришни талаб қилди. Бу ҳақда Билд хабар берди.
Оммавий норозилик намойишлари 2024 йилнинг ноябрь ойида Нови-Саддаги темир йўл станциясида том қулаб тушиши, оқибатда 15 киши ҳалок бўлгани сабаб бошланган эди. Намойишчилар фожиага коррупция, бепарволик, қурилишда хавфсизлик қоидаларига риоя қилмаслик ва Сербия раҳбариятидаги “таниш-билишчилик” сабаб бўлганини айтган. Намойишлар тўлқини бошланганидан кўп ўтмай республика қурилиш вазири Горан Весич истеъфога чиққан. Кейинроқ у ва вокзални реконструкция қилиш билан боғлиқ яна 12 киши қўлга олинган, бироқ бу норозилик тўлқинини камайтирмади.
Намойишчилар Вучични коррупцион тузилмаларни қўллаб-қувватлаш, ОАВ эркинлигини чеклаш ва сайловларда манипуляция қилишда айбламоқда. Полиция маълумотларига кўра, Белград чеккасидаги шаҳарлардан бирида автомобиль намойишчилар оломонини босиб кетган, уч нафар йигит жароҳатланган.
Митинг иштирокчилари орасида энг машҳур шиорлардан бири “Коррупция ўлдиради!” шиори бўлди, кўпчилик қонли қўллар тасвирланган нишонлар тақиб намойишга чиқди. Вучич норозилик намойишларини шарҳлар экан, “намойишчиларнинг 99 фоизи тинч йўл билан бўлганин” айтди. Шу билан бирга, олти нафар фаоллар “конституциявий тузумга қарши ҳаракат қилишга уриниш”да айбланиб, ҳибсга олинган.
Намойишнинг кенг кўламлилиги фонида полициячилар президент қароргоҳи ва парламент бинолари олдида ҳам ҳимоя тўсиқларини ўрнатган, бироқ намойиш вақтида уларга ҳужум қилишга уринишлар ҳақида хабар берилмаган. Президент Вучич лавозимини тарк этиш ниятида эмаслигини айтди.
Мен тирик эканман, ҳеч қандай ўтиш даври ёки фирибгар ҳукуматлар бўлмайди. Мен шантаж ва босимга рози эмасман, мен Сербия президентиман ва бу мамлакатда кўча қоидаларни белгилашига йўл қўймайман, деган у.
Акциядан сўнг Сербия президенти яна миллатга мурожаат қилган. Унинг сўзларига кўра, намойишдаги тўқнашувлар оқибатида 56 киши касалхонага ётқизилган, яна 22 киши қўлга олинган. Вучич Ички ишлар вазирлиги тақдим этган намойишчилар сони ҳақидаги маълумотларга қўшилмаган. У бошқа идоралар иштирокчилар сонини камроқ ҳисоблаганини айтган.
Изоҳ (0)