O‘zbekistonda korrupsiya xavf-xatarlarini aniqlash va bartaraf etish bo‘yicha yangi mexanizm joriy etiladi. Bu haqda Korrupsiyaga qarshi kurashish agentligi matbuot xizmati xabar berdi.
Ma’lum qilinishicha, 13-may kuni Bosh prokuraturada Korrupsiyaga qarshi kurashish milliy kengashining kengaytirilgan yig‘ilishida davlat rahbari tomonidan belgilab berilgan vazifalar ijrosini taʼminlash borasida amalga oshirilayotgan ishlar muhokamasiga bag‘ishlangan yig‘ilish bo‘lib o‘tdi. Unda bosh prokuror birinchi o‘rinbosari Bahriddin Valiyev, Korrupsiyaga qarshi kurashish agentligi direktori Akmal Burxonov hamda Prezident administratsiyasi mas’ul xodimi ishtirok etdi.
Bosh prokuratura matbuot xizmatining xabar qilishicha, yig‘ilishda korrupsiyaviy omillarni aniqlash va bartaraf etish bo‘yicha “Andijon tajribasi” asosida barcha hududlar tomonidan “yo‘l xaritalari” ishlab chiqilib, ijroga qaratilgani, korrupsiyaning oldini olish, ayniqsa, maishiy korrupsiyaga barham berish, hududlarda korrupsiyaga nisbatan murosasiz muhit yaratish maqsadida yangi mexanizmlarni yo‘lga qo‘yish yuzasidan tuzilgan Respublika va hududiy ishchi guruhlarining vazifalari birma-bir ta’kidlab o‘tildi.
Jumladan, hududiy ishchi guruhlariga har haftada bevosita bitta hududga chiqqan holda korrupsiya xavf-xatari yuqori bo‘lgan obyektlarda korrupsiyaviy omillarni o‘rganish va ularni bartaraf etish choralarini ko‘rish topshirildi.
Shuningdek, Respublika ishchi guruhi a’zolariga hududlarda amalga oshirilgan vazifalar ijrosini sifatli tashkil etishni nazorat qilish va har hafta joyiga chiqqan holda bajarilgan ishlarni o‘rganib, natijalari yuzasidan tanqidiy muhokamalar o‘tkazib borish bo‘yicha reja-grafik ishlab chiqish hamda korrupsiyaviy omillarni bartaraf etishga qaratilgan takliflarni tayyorlash belgilab olindi.
Yig‘ilishda barcha hududlarga ishlab chiqilgan “yo‘l xaritalari” bo‘yicha belgilangan chora-tadbirlarni o‘z vaqtida sifatli bajarish hamda hududiy ishchi guruhlar faoliyatini samarali yo‘lga qo‘yish yuzasidan topshiriqlar berildi.
Tadbir so‘ngida, viloyat prokurorlarining birinchi o‘rinbosarlari, ishchi guruh a’zolarining tushuntirish va axborotlari eshitilib, ular tomonidan kelgusidagi faoliyatida hududlarda korrupsiyaviy omillarni aniqlash va bartaraf qilishda samaradorlikka erishilmagan taqdirda qat’iy choralar qo‘llanishi haqida ogohlantirildi.
2024-yil sentyabrida Oliy Majlis Senatining yig‘ilishida taqdim etilgan korrupsiyaga qarshi kurashish bo‘yicha uchinchi milliy ma’ruzada, korrupsiya bilan bog‘liq jinoyatlar natijasida davlat manfaatlariga yetkazilgan zararning yuqori ulushi Andijon viloyatiga to‘g‘ri kelgani ma’lum qilingandi.
Izoh (0)