“Барселона” ва Бразилия терма жамоаси футболчиси Рафинья “Олтин тўп” соврини ҳақида ўз фикрлари билан ўртоқлашди. Бу ҳақда Championat нашри хабар бермоқда.
Унинг айтишича, индивидуал мукофотлар эмас, балки жамоавий ютуқлар муҳимроқ.
“Олтин тўп” ҳақида ўйлаганим йўқ. Агар уни қўлга киритсам, бу клубим ва мамлакатим учун қилган меҳнатим натижаси бўлади. Аммо менинг асосий мақсадим — жамоа билан биргаликда совринлар ютиш. Индивидуал мукофотлар кейинроқ ўзи келади. Агар келмаса, бу ҳам муаммо эмас.
Кўплар менга “Олтин тўп” ҳақида мемлар юборишади, лекин буни аҳамияти йўқ. Бу — ўзим олдимга қўйган мақсад эмас. Мақсадим — жамоам билан чемпионликларга эришиш ва ўйинларда бор кучимни бериш, деди Рафинья Barca Universal нашрига берган интервьюсида.
Маълумот учун, Рафинья 2022 йилдан бери Каталония клубида тўп суради. У “Барселона”га Англиянинг “Лидс” клубидан келиб қўшилган. Жорий мавсумда бразилиялик футболчи 54 та ўйинда майдонга тушиб, 34 та гол ҳамда 25 та голли узатмага муаллифлик қилган. Transfermarkt портали унинг қийматини 80 миллион еврога баҳолаган. Ҳужумчининг клуб билан амалдаги шартномаси 2027 йилнинг 30 июнига қадар мўлжалланган.
Изоҳ (0)