“Барселона” вингери Рафинья УЕФА Чемпионлар Лигаси чорак финал босқичидаги “Боруссия Дортмунд”га қарши биринчи учрашувда (4:0) ажойиб ўйин намойиш этди. Ушбу баҳсдан кейин ESPN нашри футболчини “Олтин тўп” учун асосий даъвогар сифатида эътироф этди.
Англия Премьер Лигасида “Лидс” билан қуйи лигага тушиб кетиши мумкин бўлган бразилиялик футболчи орадан уч йил ўтиб, “Олтин тўп” учун асосий номзод, деб ёзади ESPN.
Рафинья мазкур баҳсда бир гол уриб, икки голга ассистентлик қилди. Шу тариқа, у “Барселона” билан бир мавсум ичида Чемпионлар Лигасидаги баҳсларда 12 та самарали ҳаракат (голлар ва ассистлар) қайд этган Лионель Мессининг рекордига етиб олди. Каталонияликлар ҳозирча мусобақанинг чорак финал босқичида ва бразилиялик футболчи бу натижани янгилаши эҳтимоли анча юқори.
Умуман олганда, Рафинья жорий мавсумда “Барселона” сафида 50 та голда иштирок этган футболчи ҳисобланади.
Маълумот учун, у “Барселона”га 2022 йил “Лидс”дан трансфер қилинган эди.
Изоҳ (0)