Ўзбекистонда ногиронлиги бўлган шахсларни ишга қабул қилган тадбиркорларга 2025 йил 1 июндан 50 миллион сўмгача субсидия ажратилади. Бу ҳақда президент фармонида белгиланди.
“Ногиронлиги бўлган шахсларнинг бандлигини таъминлаш тизимини такомиллаштиришга оид қўшимча чора тадбирлар тўғрисида”ги президент фармони билан асосий мақсадлар этиб қуйидагилар белгиланди:
- ногиронлиги бўлган шахсларнинг самарали фаолият кўрсатиши учун махсус хизматлар тизимини жорий этиш;
- ногиронлиги бўлган ёшларни замонавий касбларга ўқитиш, уларнинг меҳнат бозорига кириши учун қўшимча имкониятлар яратиш;
- 2025 йил якунига қадар 80 минг нафар ногиронлиги бўлган шахснинг барқарор бандлиги ва муносиб даромад топишини таъминлаш.
Ҳужжатга кўра, 2025 йил 1 июндан бошлаб I ва II гуруҳ ногиронлиги бўлган шахсларни ишга қабул қилган тадбиркорлик субъектларига 50 миллион сўмгача субсидия ажратилади. Субсидия сурдотаржимон, психолог ва ҳамроҳлик хизматини ташкил қилиш харажатларини қоплаш учун ажратилади.
Шу санадан бошлаб жисмоний шахсларга ҳамроҳлик хизматини ўзини ўзи банд қилган шахс сифатида кўрсатишга рухсат берилади. Шунингдек, “Ягона миллий ижтимоий ҳимоя” ахборот тизимида Меҳнатга лаёқатли ногиронлиги бўлган шахсларнинг электрон реестри юритилади.
Иш берувчига ногиронлиги бўлган ҳар бир шахсни ишга қабул қилганлиги учун 6 ой давомида ишланган ҳар бир ой учун БҲМнинг 1,5 баравари миқдорида субсидия ҳам берилади. Бу ҳукуматнинг “Ногиронлиги бўлган шахсларнинг бандлигига кўмаклашишни рағбатлантириш чора-тадбирлари тўғрисида”ги қарорида белгиланган. Ўзбекистондаги барча аэропорт, вокзал, автошоҳбекатларда жисмоний имконияти чекланганлар учун шароитлар яратилади.
“Ногиронлиги бўлган болаларга ижтимоий хизмат ва ёрдам кўрсатиш тизимини янада такомиллаштириш бўйича қўшимча чора-тадбирлар тўғрисида”ги президент қарори билан ногиронлиги бўлган болалар учун кундузги парвариш хизмати йўлга қўйилди.
Изоҳ (0)