Наврўз байрами тадбирлари доирасида Тошкент шаҳрида Ижтимоий туризм ассоциацияси ҳамда Туризм ва маданий мерос вазирлиги ҳамкорлигида ташкил этилган Ногиронлар ва ногиронлиги бўлган шахсларни қўллаб-қувватлаш марказининг очилиш маросими бўлиб ўтди. Бу ҳақда вазирлик матбуот хизмати хабар берди.
Марказнинг асосий мақсади ногирон ватандошлар ва эҳтиёжманд оилалар фарзандлари учун хайрия тадбирларини ўтказишдан иборат.
Очилиш маросимида бош вазир ўринбосари, туризм ва маданий мерос вазири Азиз Абдуҳакимов, Тошкент шаҳар ҳокими Жаҳонгир Ортиқхўжаев, Туризм ва маданий мерос вазирлиги, Ижтимоий туризм ассоциациялари ҳамда оммавий ахборот воситалари вакиллари иштирок этган.
Ногиронлар ва ногиронлиги бўлган шахсларни қўллаб-қувватлаш марказининг асосий вазифалари:
- инклюзив туризмни ривожлантириш бўйича қўшма лойиҳаларни амалга ошириш;
- ногиронларнинг ҳаракатланиши учун шароит яратишга кўмаклашиш;
- ижтимоий туризм соҳасида давлат дастурлари, ҳуқуқий ҳужжатлар ва бошқа қарорлар лойиҳаларини ишлаб чиқиш ва жамоатчилик назоратини амалга ошириш;
- туристик объектларда имконияти чекланган шахслар учун яратилган шарт-шароитларни ўрганиш;
- Самарқанд, Бухоро, Хива, Қорақалпоғистонда қулай туристик йўналишларни ривожлантириш;
- вазирликлар ва бошқа давлат ташкилотлари билан ҳамкорликда хайрия тадбирларини ташкил этиш.
Туризм ва маданий мерос вазирлиги Ижтимоий туризм ассоциацияси билан ҳамкорликда «Саёҳат барча учун» лойиҳаси доирасида 50 нафар имконияти чекланган фуқаро учун Самарқанд ва Бухоро шаҳарларига икки кунлик туристик саёҳатлар ташкил этган. 2022 йил давомида мазкур лойиҳа доирасида 200 кишининг Самарқанд шаҳрига саёҳатларини ташкил этиш режалаштирилган.
Туристлар учун сарфланадиган харажатларнинг 50 фоизи грант маблағлари, 50 фоизи эса хайрия маблағлари ҳисобидан қопланиши тахмин қилинмоқда.
Аввалроқ Шавкат Мирзиёев ногиронлиги бўлган шахсларни ижтимоий қўллаб-қувватлаш чораларини янада кучайтиришга қаратилган фармонни имзолагани тўғрисида хабар берилганди. Фармонга кўра, эндиликда ногирон бўлиб қолиши муддатидан қатъи назар, ногиронлиги бўлган шахсларга бир хил миқдорда — 622 минг сўмга тенг нафақа тайинлаб борилади. Дастлабки ҳисоб-китобларга кўра, 49 минг нафар ногиронлиги бўлган шахслар учун нафақа 41 фоизга ошади. Мазкур чорани амалга оширишга 2022 йилга қўшимча 81 миллиард сўм ажратилади.
Изоҳ (0)