28 апрель куни Олий Мажлис Сенатининг йигирма бешинчи ялпи мажлиси чақирилгани тўғрисида хабар берилганди. ЎзАънинг ёзишича, унда «Ўзбекистон Республикасида тиббий-ижтимоий хизматлар тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартишлар киритиш тўғрисида»ги қонун кўриб чиқилган ва сенаторлар томонидан маъқулланган.
Ялпи мажлис муҳокамасига олиб чиқилган қонунда «Ногиронлиги бўлган шахсларнинг ҳуқуқлари тўғрисида»ги қонун тиббий-ижтимоий хизматлар соҳасидаги сўнгги ислоҳотларни инобатга олган ҳолда ишлаб чиқилган.
Бундан ташқари, Маъмурий жавобгарлик тўғрисидаги кодексга меҳмонхоналарда ногиронлиги бўлган шахсларга шарт-шароитлар яратиш талабларини бажармагани учун жавобгарлик белгиланмоқда. «Афсуски, турли масалаларда олис манзилларга борган ногиронлиги бўлган шахслар меҳмонхоналарда бу жиҳатга етарлича эътибор берилмагани учун қийинчиликка дуч келишади. Уларга фақатгина пандус йўлаклари эмас, балки хоналарда талаб этиладиган шароит ҳам керак бўлади. Бу ўз навбатида замон андозаларига мос бинони лойиҳалаштириш, бино инфратузилмасига янада эътибор ва масъулият билан ёндашишни талаб этиб, хизмат кўрсатиш сифати ва аҳамиятлиликни оширишга олиб келади», — дейилади хабарда.
Шу билан бирга, «Фуқаролар соғлиғини сақлаш тўғрисида»ги қонунга «тиббий-ижтимоий экспертиза» тушунчаси ҳамда «Бола ҳуқуқларининг кафолатлари тўғрисида»ги қонунидаги «ногиронлиги бўлган болалар» тушунчаси батафсил ёритиб берилмоқда.
Аввалроқ Ўзбекистонда энди ногиронлик белгилари аниқ кўриниб турган шахсларга ногиронлик мақоми қўшимча текширувлар ўтказилмасдан муддатсиз даврга белгиланиши тўғрисида хабар берилганди.
Изоҳ (0)