Ўзбекистон қонунчилигида 2023 йил 1-октябрдан бир қатор ўзгариш ва янгиликлар кучга киради. Қуйида ушбу санадан кучга кирадиган асосий ўзгаришлар тақдим этилди.
Кичик бизнесни қўллаб-қувватлаш дастури бошланади
Дастурда иштирок этувчи кичик тадбиркорлик субъектларига, жумладан, фаолиятини йўлга қўйиш ёки кенгайтириш учун 2 йилгача имтиёзли давр билан 7 йилгача ҳамда айланма маблағлар учун револвер тарзда 3 йилгача йиллик Марказий банк асосий ставкасидан 4 фоизлик юқори ставкада 1,5 миллиард сўмгача кредитлар ажратилади ва (ёки) асосий воситаларни сотиб олиш учун лизинг берилади.
Бунда, 100 миллион сўмгача кредитларни гаровсиз, 150 миллион сўмгача кредитларни гаров талаби 50 фоизгача пасайтирилган ҳолда ажратиш имконияти назарда тутилади:
- қиймати 1,5 миллиард сўмгача бўлган асосий воситалар 7 йилгача бўлиб-бўлиб тўлаш шарти билан қарзга берилади;
- инновацион ишланмаларни тижоратлаштириш, юқори технологик стартап лойиҳаларига давлат илмий дастурлари доирасида 2 миллиард сўмгача грант маблағлари ажратилади.
Электр таъминоти ва газ учун тарифлар ўзгаради
Ёқилғи-энергетика ресурслари учун янги тарифлар жорий этилади. Истеъмолчиларнинг 1- ва 2-гуруҳ тоифаси учун электр энергияси 1 квт/соат учун 1 000 сўмгача (НКМК, ОТМК, Ўзбекистон металлургия заводи, бюджет ташкилотлари), қолган бизнес ва юридик шахслар учун квт/соатига 900 сўмгача оширилмоқда. Табиий газ тарифлари эса НКМК, ОТМК, “Ўзбекистон металлургия заводи” ва бюджет ташкилотлари учун бир кубига 1 800 сўмгача, бошқа ташкилотларга кубига 1 500 сўмгача миқдорда белгиланмоқда.
Бунда жорий куз-қиш мавсумида аҳоли учун иситиш хизматлари нархлари ошмайди.
Жазони ижро этиш муассасаларидан озод қилинган шахсларни ишга олганларга субсидия берилади.
Бундай шахсларни ишга қабул қилган иш берувчиларга ҳар бир шахс учун 3 ойдан ортиқ муддатда меҳнат фаолиятини давом эттиргандан сўнг БҲМнинг 3 баравари (990 минг сўм) миқдорида бир марталик субсидия ажратилади. Бироқ, бюджет ташкилотлари, давлат корхоналари, устав (фонди) капиталида давлат улуши 50 фоиз ва ундан ортиқ бўлган юридик шахслар учун амал қилмайди.
Давлат хизматлари жойларга чиққан ҳолда амалга оширилади
Давлат хизматларини жойига чиққан ҳолда кўрсатиш ёки давлат хизматларидан фойдаланишга ариза юбориш учун Тошкент шаҳрида БҲМнинг 50 фоизи, вилоят марказларида — БҲМнинг 40 фоизи, туман (шаҳар)ларда — БҲМнинг 30 фоизи миқдорида бир марталик тўлов ундирилади. Ўзгалар ёрдамига муҳтож қариялар, соғлиғининг ҳолатига кўра мустақил ҳаракатланиш имконияти чекланган ҳамда I ва II гуруҳ ногиронлиги бўлган шахсларга давлат хизматлари кўрсатилганлиги учун тўлов ундирилмайди.
ID-карта ва хорижга чиқиш паспортларини почта орқали олиш имконияти яратилади
Ҳукумат қарори билан, 1-октябргача ID-карта ва хорижга чиқиш биометрик паспортини фуқароларнинг яшаш жойига почта жўнатмаси сифатида жўнатиш тизими йўлга қўйилиши белгиланган.
Давлатга тегишли сув омборлари тадбиркорларга ижарага берилади
Давлатга тегишли сув ҳавзалари фойдаланиш шарти билан қуйидаги фаолият турларини ташкил этиш учун электрон савдо платформасида онлайн-аукцион орқали камида 10 йилга ижарага берилади:
- давлатга тегишли табиий ва сунъий сув ҳавзалари (сув омборлари) – балиқни саноат усулида етиштириш ва овлаш учун;
- табиий ва сунъий сув ҳавзалари (сув омборлари) ҳамда дарё атрофидаги қишлоқ хўжалигига мўлжалланмаган ер участкалари — сув бўйида пляж зоналарини ташкил этиш, спорт-ишқибозлик туридаги балиқ овлаш, балиқ ови, қайиқда сузиш ва сув саёҳати бўйича хизматлар кўрсатиш, балиқ маҳсулотлари, шу жумладан, балиқ таомлари савдоси, умумий овқатланиш ва бошқа туризм хизматларини ташкил этиш ҳамда ушбу мақсадларда енгил конструкцияли қурилмаларни (ўтов лагерлари мажмуаси, контейнерларни) жойлаштириш учун.
Олтита ҳудудда Кадастр муҳандиси институти жорий этилади
Тошкент шаҳри, Тошкент, Навоий, Наманган, Фарғона ва Хоразм вилоятларида Уй-жой фондига кирувчи кўчмас мулк объектлари бўйича кадастр муҳандиси институти жорий этилади. Малака шаҳодатномасига эга кўчмас мулк бўйича кадастр муҳандисларига кўчмас мулк объектларига бирламчи кадастр йиғмажилдини тайёрлаш ҳуқуқи берилади.
Зиёратчиларга хизмат кўрсатувчи туроператорлар хизмати баҳоланади
Умра хизматларини кўрсатувчи туроператорлар фаолиятини рейтинг асосида баҳолаш тизими жорий этилади.
Ижтимоий хизматлар бўйича мурожаатлар ягона тизим орқали амалга оширилади
“Ижтимоий ҳимоя ягона реестри” ахборот тизими президент ҳузурида Ижтимоий ҳимоя миллий агентлиги тасарруфига ўтказилади. Аҳолига кўрсатиладиган барча турдаги ижтимоий хизматлар ва ёрдамлар, шу жумладан, кам таъминланган оилалар болалари учун нафақа ва моддий ёрдамлар бўйича аризалар мазкур ахборот тизими орқали қабул қилинади.
Тадбиркорларга молиявий санкциялар фақат суд тартибида қўлланилади
Тадбиркорларга миқдори 10 миллион сўмдан юқори бўлган солиққа оид ҳуқуқбузарликлар учун, агар тадбиркорлик субъекти ҳуқуқбузарликни инкор этса, молиявий санкцияларни фақатгина суд тартибида қўллаш амалиёти йўлга қўйилади.
Tax Gap амалиёти тақиқланади
ҚҚСни қайтаришда солиқ узилиши коэффициентини қўллаш бекор қилинади.
Нодавлат таълим ташкилотлари фаолиятини ташкил қилишда енгилликлар берилади
Нодавлат мактабгача ва умумий ўрта таълим ташкилотлари фаолиятини ташкил қилишда ўқитувчиларнинг тоифалари ҳамда битта синфда таълим олувчиларнинг максимал сонига қўйилган талаблар енгиллаштирилади.
Шаҳарсозлик соҳасидаги айрим мутахассисларни сертификатлаш бошланади
Буюртмачи хизматларининг лойиҳа бошқаруви ва техник назорат мутахассислари, лойиҳа ташкилотларининг муаллифлик назорати мутахассислари, лойиҳа бош муҳандислари ва бош архитекторлари, пудрат ташкилотларининг ички назорат мутахассисларини ўқитиш ва сертификатлаш йўлга қўйилади.
Изоҳ (0)