«Ногирон кишини ишли қилган тадбиркорга салкам 11 млн сўм субсидия ва ойига 540 минг сўмдан қўшимча ҳақ». Вазир ўринбосари ногиронларни иш билан банд қилганларга яратилган имконият ҳақида

Ўзбекистонда сўнгги икки йил давомида ногиронлиги бўлган фуқароларни ишли қилган тадбиркорларга ҳар бир ишчиси учун 10 миллион 800 минг сўмгача субсидия, шунингдек 12 ой давомида базавий ҳисоблаш миқдорининг икки баравари — 540 минг сўм миқдорида ҳақ тўлаш тартиби жорий этилган. Бу ҳақда Бандлик ва меҳнат муносабатлари вазирлиги масъуллари билан бўлган матбуот анжуманида маълум қилинди.

«Сўнгги икки йил ичида ногиронлиги бўлган шахсларни ишга қабул қилган иш берувчиларни қўллаб-қувватлаш бўйича иккита тартиб жорий этилган. Жумладан хусусий тадбиркорлик субъектларига иш ўринлари ва шароитларини ногиронлиги бўлган шахсларга мослаштириш учун ҳар бир мослаштирилаётган иш жойига базавий ҳисоблаш миқдорининг 40 бараваригача — 10 миллион 800 минг сўм миқдорда субсидия ажратилмоқда. Шунингдек, ижтимоий муҳтож аҳоли қатламларига мансуб шахсларни квоталанган энг кам сондан ортиқ миқдорда ишга қабул қилган ташкилотларга — ҳар бир ходим учун 12 ой давомида ҳар ойда базавий ҳисоблаш миқдорининг 2 баравари — 540 минг сўм миқдорида ҳақ тўлаш тартиби жорий этилган. Аммо буни кўпчилик тадбиркорларимиз ҳам билмайди. Шунинг учун ОАВ вакиллари орқали буни кўпроқ тарғиб қилиб, тадбиркорларимизга етказишимиз керак», — деди вазир ўринбосари.

Вазир ўринбосарининг қўшимча қилишича, ногиронлиги бор фуқароларни касб-ҳунарга ўқитиш учун Бандликка кўмаклашиш давлат жамғармаси ҳисобидан 5 миллиард 400 миллион сўм маблағ ажратилган.

«2022 йилнинг май ойидан ҳар бир ҳудудда Бандликка кўмаклашиш давлат жамғармаси маблағлари ҳисобидан ногиронлиги бўлган шахсларни махсус дастурлар асосида касб-ҳунарга тайёрлаш, қайта тайёрлаш ва уларнинг малакасининг ошириш учун ҳар бир ногиронлиги бўлган шахсларнинг касб-ҳунарга ўқитиш учун бир ойга 1 миллион 100 минг сўмгача грантлар ажратилади. Ушбу мақсадлар учун Бандликка кўмаклашиш давлат жамғармаси ҳисобидан 5 миллиард 400 миллион сўм маблағ ажратиш белгиланди. Грантлар эвазига 2022 йилнинг биринчи ярмида қарийб икки минг нафар ногиронлиги бўлган шахсларни касб-ҳунарга ўқитишни режалаштирдик», — дейди вазирнинг биринчи ўринбосари Эркин Муҳитдинов.