Андижон вилояти ҳокимлиги Шуҳрат Абдураҳмонов вояга етмаган шахсга нисбатан жиноий ҳаракат содир этгани ҳақида тарқалган хабарларни рад этди.
Ҳокимлик матбуот хизматининг билдиришича, 9 май куни ижтимоий тармоқларда блогер Улуғбек Ашур томонидан Андижон вилояти ҳокими Шуҳрат Абдураҳмоновга нисбатан оғир ва асоссиз айбловлар келтирилган пост жойлаштирилди. Унда блогер “Андижонлик фуқаро маълумот беришича” деган сўзлар билан, гўёки вилоят ҳокими вояга етмаган шахсга нисбатан жиноий ҳаракат содир этгани ҳақида айтиб ўтган.
Андижон вилояти ҳокимлиги ушбу маълумотларни кескин рад этади. "Фуқаро маълумотига" асосланган, ҳеч қандай далилга эга бўлмаган бундай постлар шахс шаъни, қадр-қиммати ва нуфузига очиқдан-очиқ тажовуздир, дейилади ҳокимлик хабарида.
Таъкидланишича, ижтимоий тармоқлардаги туҳмат ва ҳақоратларга асос бўлаётган манбалар шубҳали ва ноқонуний бўлиб, бу ҳолатга ҳуқуқий баҳо берилади. Айни пайтда ушбу асоссиз маълумотларни тарқатганлар ва жамоатчилик онгида нотўғри фикр уйғотишга уринган шахслар юзасидан тегишли ҳуқуқни муҳофаза қилувчи органларга мурожаат қилинди. Қонунга мувофиқ равишда уларга нисбатан жазо чоралари қўлланилади.
Ҳокимлик жамоатчиликдан фақат расмий ва ишончли манбаларга таянишни, иғвогарона маълумотларга учмасликни сўради.
2023 йилнинг апрелида Андижон вилояти ҳокимлиги Шуҳрат Абдураҳмонов ҳақида тарқалган хабарлар юзасидан баёнот бериб, прокуратура органларига шикоят аризаси юборилганини маълум қилганди. Ўшанда интернетда вилоят ҳокими акс этгани иддао қилинган видео тарқалиши ортидан, ижтимоий тармоқлардаги айрим саҳифаларда ҳокимнинг шаъни ва қадр-қимматини камситувчи ҳамда обрўсизлантирувчи ҳақоратомуз постлар эълон қилинганди.
Изоҳ (0)