“Вилоят ҳокими — вилоятнинг отаси дегани”. Шуҳрат Абдураҳмонов 36 нафар ёшларнинг муаммосини тинглади

Андижон вилояти ҳокими Шуҳрат Абдураҳмонов турли муаммолари борлиги айтилаётган 36 нафар ёш билан учрашув ўтказди. 

Вилоят ҳокимининг сўзларига кўра, ҳудуддаги қизил тоифага кирган ёшлар раҳбарларга бўлиб берилган. Шу қаторда 36 нафар ёш ҳокимнинг рўйхатига тушган. Шуҳрат Абдураҳмонов уларнинг муаммоларини тинглаб, ёрдам беришга, йўл кўрсатишга ваъда берди. Шунингдек, натижа бўлиши учун улар ҳам ҳаракат қилиши кераклигини таъкидлади.

Яшил тоифадаги ёшларнинг муаммоси йўқ, ўқияпти, ишлаяпти. Сариқ тоифадаги, қизил тоифадаги ёшларимиз бор. Булар ҳаётда нимадандир қоқилган, нимадандир қийналган, нимадандир муаммоси бор. 11 294 та адашмасам болалар рўйхатини билиб беришган. Шуларни ўзимдан бошлаб ҳамма раҳбарларга бўлиб чиқдим. Ота бўлиб гаплашасан, дедим. Шу жумладан мана шу ерда ўтирган 36 нафар ёш менга тушган. 

Билинг, мен ўтирган лавозим, вилоят ҳокими — вилоятнинг отаси дегани. Шу сабабли Андижоннинг қизлари менинг қизларим дейман. Шу сабабли бугундан бошлаб қўлимдан келганича нима муаммоларингиз бўлса ёрдам бераман. Ҳаётда йўлингни топиб олсанг бўлди. 

Қарс икки қўлдан чиқади. Мен сизларга ёрдам беряпман. Мен қилсам-у, сен қилмасанг айтаётган нарсамиз чиқмай қолади. Сен ҳам ҳаракат қиласан, мен ҳам ҳаракат қиламан. Шунда натижа бўлади. Йўлга солиб қўяман, ундан кейин аравани ўзинг судраб кетишинг керак. Шуни билинглар демоқчиман. Яхши бўлиши учун ҳаракат қиламан, — дейди вилоят ҳокими.