Кристофер Нолан “Одиссея” фильмини Ғарбий Саҳройи Кабирнинг Марокаш томонидан босиб олинган ҳудудида суратга олгани учун танқидларга учради

Режиссёр Кристофер Нолан янги “Одиссея” фильмининг бир нечта саҳналарини Ғарбий Саҳройи Кабирнинг Марокаш назоратида бўлган қисмида суратга олгани туфайли танқидга учради, деб хабар берди “Правила жизни”.

Янги фильмни суратга олиш ишлари Дaxла шаҳри яқинида бўлиб ўтган. 1975 йилда Испания мустамлакадан воз кечгач, ҳудудни назорат қилиш масаласи очиқ қолган. Шу пайтдан бошлаб Марокаш ва POLISARIO фронти (Саҳройи Кабир озодлик фронти) ўртасида можаролар бошланди.

Сўнг Марокаш Ғарбий Саҳройи Кабирни ўз ҳудудининг ажралмас қисми деб эълон қилган ва ҳозирда унинг тахминан 80 фоиз қисмини назорат қилади. Ҳудуд расмий равишда БМТ томонидан “ўзини ўзи бошқара олмайдиган (мустамлака) ҳудуд” сифатида қайд этилган.

Ғарбий Саҳройи Кабир халқаро кинофестивали (FiSahara) Ноланни суратга олиш ишларини зудлик билан тўхтатишга чақирди. Фестивал вакилларининг сўзларига кўра, Нолан ва унинг жамоаси ўз ҳаракатлари билан “Марокаш ҳокимиятининг халққа тазйиқ ўтказишига беихтиёр ўз ҳиссасини қўшмоқда”.

“Дaxла шаҳри фақат кино суратга олиш учун мос келадиган гўзал саҳролардан иборат эмас. Аввало, бу ер босиб олинган, ҳарбий кучлар томонидан назорат қилинадиган шаҳар бўлиб, унинг туб аҳолиси марокашлик кучлар томонидан шафқатсиз босимга учрамоқда”, дейди фестивал ташкилотчилари.

Ғарбий Саҳройи Кабирда аввал ҳам йирик бюджетли суратга олиш ишлари олиб борилган. Жумладан, Amazonʼнинг “Вақт чархпалаги” сериали ҳам айнан шу ҳудудда ишланган.

Мазкур ҳудудда узоқ йиллардан бери халқаро низолар давом этмоқда. 1970 йилларнинг ўрталарида ташкил этилган POLISARIO фронти (Сегиэт-эл-Ҳамра ва Рио-де-Оро халқ озодлик фронти) Жазоир ёрдами билан мустақиллик учун қуролли кураш бошлаган эди. Можаролар 1991 йилгача давом этди ва БМТнинг тинчликпарвар миссияси ёрдамида тўхтатилди. Марокаш Ғарбий Саҳройи Кабирни ўз ҳудудининг ажралмас қисми деб эълон қилди ва ҳозирда унинг тахминан 80 фоизини назорат қилиб келади.

Кристофер Ноланнинг қадимги юнон достони асосида фильм ишлаётгани 2024 йил декабрида маълум бўлган эди. Лойиҳа “мифологик жангари” жанрида бўлиши ва янги IMAX технологиясидан фойдаланиб суратга олиниши айтилган эди. Фильмда Метт Деймон, Том Ҳолланд, Зендая, Энн Ҳетеуэй, Роберт Паттинсон, Лупита Нионго ва Шарлиз Терон иштирок этиши кутилмоқда.