“Медведев ўзини ҳануз президентман деб ўйлайди” — Трамп Россиянинг собиқ раҳбарини танқид қилди

АҚШ президенти Дональд Трамп Россиянинг собиқ раҳбари Дмитрий Медведев билан Х ижтимоий тармоғида кескин зиддиятга борди. Сиёсатчилар ўртасидаги баҳсга Медведевнинг Украина борасидаги изоҳи сабаб бўлди. Бу ҳақда Тhе Economic Times хабар берди.

Трамп Россияга қарши янги санкцияларни эълон қилишини айтганидан сўнг, Медведев АҚШ президентини танқид қилган ва мамлакатни Исроил ва Эронга қиёсламасликни таъкидлаган.

“Трамп Россияга ультиматумлар қўймоқда: аввал 50 кун, энди 10 кун. У шуни билиб қўйсинки, Россия — на Исроил, на Эрон. Ҳар бир ультиматум уруш сари қадамдир”, деб ёзган Медведев.

Бунга жавобан Трамп Хʼда қуйидагича пост жойлаган:  

“Медведев — ютқазган собиқ президент, ўзини ҳануз раҳбар деб ўйлайди. У сўзларига эҳтиёт бўлиши лозим. Жуда хавфли ҳудудга кириб келяпти!”

Трамп, шунингдек, Ҳиндистондан импорт қилинадиган маҳсулотларга 25 фоизлик бож жорий этганини эслатиб, Ҳиндистон ва Россиянинг иқтисодий алоқаларини танқид қилган:

“Агар Ҳиндистон Россия билан иқтисодини қулатмоқчи бўлса, марҳамат. Менга бунинг мутлақо фарқи йўқ”.

Бунга жавобан Медведев Трампни “юриб кетаётган мурдалар” ҳақидаги фильмларни эслашга чақирган. У АҚШ президентининг Ҳиндистон ва Россиянинг “ўлик иқтисодиёти” ҳақидаги баёнотларига шундай муносабат билдирди:

“Агар Россия собиқ президентининг баъзи сўзлари АҚШ президентида бундай асабий реакцияни келтириб чиқарса, демак, Россия ҳамма нарсада ҳақ ва ўз йўлида давом этади”.

Трамп июль ўрталарида Россияга қарши янги санкциялар жорий этилиши борасида огоҳлантириш берган, хусусан, у агар сентябрь бошигача тинчлик борасида ўзгариш бўлмаса, бож тарифлари жорий этилишини билдирганди. Эндиликда у Путинга 10–12 кун муддат белгиламоқда — бу эса август бошигача музокараларда ижобий ўзгаришлар бўлиши кераклигини англатади.

Трампнинг биринчи президентлик даври охирларига келиб АҚШ Россияга нисбатан баъзи санкция ва дипломатик босимларни кучайтирганди. Бу Медведевнинг танқидларига сабаб бўлиб, у Трампни “заиф” ёки “иккиюзлама” сиёсатда айблаганди.

Маълумот учун, Дмитрий Медведев 2008–2012 йилларда Россия президенти лавозимида ишлаган. Ҳозирги кунда сиёсатчи Россия Хавфсизлик кенгаши раиси ўринбосари сифатида фаолият юритмоқда.