Андижон вилоятининг ярмидан кўпини электр билан таъминловчи лойиҳани амалга ошириш бўйича Хитой компанияси билан келишувга эришилди. Бу ҳақда вилоят ҳокимлиги матбуот хизмати хабар берди.
Маълум қилинишича, Андижон вилояти ҳамда Хитойнинг Zhejiang Commercial Building компанияси билан янги келишувларга эришилди. Амалдаги ҳамкорлик 118 мегаватт қувватдаги 200 миллион долларлик ГЭСлар лойиҳаси бўйича бошланган.
17 июнь куни эса режалар янада кенгайтирилиб, Хитойнинг Синдзян-Уйғур автоном районидаги учрашувда Андижонда жами 300 мегаватт қувватдаги ГЭСлар қурилишига компания раҳбарияти билан келишиб олинди.
Ушбу лойиҳа умумий қиймати 500 миллион долларни ташкил этади. Биринчи босқичда 50 миллион доллар инвестисия маблағлари ўзлаштирилади.
“Лойиҳанинг умумий қуввати Андижон вилоятининг ярмидан кўп ҳудудларини электр билан таъминлашга етарли саналади”, — дейилади хабарда.
Бундан аввал “Зарубежнефть” компанияси билан Андижон вилоятида қиймати 100 миллион доллар бўлган 2024—2026 йилларда жами 100 мегаватт қувватга эга қуёш панелли электр станциясини қуриш лойиҳасини амалга ошириш бўйича меморандум имзоланганди.
Изоҳ (0)