UFC’нинг икки вазн тоифасидаги собиқ чемпиони — ярим енгил (66 кг) ва енгил (70 кг) вазн тоифаларида ғолиб бўлган ирландиялик Конор Макгрегор профессионал спортга қайтиш арафасида турибди. Бу ҳақда Championat нашри хабар бермоқда.
Аралаш жанг санъати (MMA) оламининг энг машҳур спортчиларидан бири саналган Макгрегор допингга қарши тест топширганини маълум қилди. У бу ҳақда ўзининг ижтимоий тармоқдаги саҳифасида қуйидагича ёзди:
Қон анализини топширдим. Шу сабаб елкамда пластир бор. Бундан жуда хурсандман. Ҳозир энг яхши спорт формасидаман.
Мазкур изоҳ антидопинг агентлиги вакиллари иштирокидаги сурат остида эълон қилинган. Бу ҳолатдан келиб чиқиб, Конор Макгрегорнинг тўрт йиллик танаффусдан сўнг октагонга қайтиш эҳтимоли сезиларли даражада ошгани айтилмоқда.
Ҳозирда Макгрегорга 37 ёш тўлган. У сўнгги жангини 2021 йил июль ойида, UFC 264 турнирида ўтказган эди. Ўша жангда Макгрегор америкалик Дастин Порьега қарши баҳс олиб бориб, биринчи раунддаёқ оёғидан оғир жароҳат олиб, техник нокаут билан мағлуб бўлганди. Ўша вақтда Порье енгил вазндаги вақтинчалик чемпионлик камарига эга чиққан.
Макгрегорнинг профессионал фаолияти 28 та жанг ўтказиб, шуларнинг 22 мартасида ғалаба бўлса, 6 баҳсда мағлубиятга учраган.
Изоҳ (0)