Andijon viloyati hokimligi Shuhrat Abdurahmonov voyaga yetmagan shaxsga nisbatan jinoiy harakat sodir etgani haqida tarqalgan xabarlarni rad etdi.
Hokimlik matbuot xizmatining bildirishicha, 9-may kuni ijtimoiy tarmoqlarda bloger Ulug‘bek Ashur tomonidan Andijon viloyati hokimi Shuhrat Abdurahmonovga nisbatan og‘ir va asossiz ayblovlar keltirilgan post joylashtirildi. Unda bloger “Andijonlik fuqaro ma’lumot berishicha” degan so‘zlar bilan, go‘yoki viloyat hokimi voyaga yetmagan shaxsga nisbatan jinoiy harakat sodir etgani haqida aytib o‘tgan.
Andijon viloyati hokimligi ushbu ma’lumotlarni keskin rad etadi. "Fuqaro ma’lumotiga" asoslangan, hech qanday dalilga ega bo‘lmagan bunday postlar shaxs sha’ni, qadr-qimmati va nufuziga ochiqdan-ochiq tajovuzdir, deyiladi hokimlik xabarida.
Ta’kidlanishicha, ijtimoiy tarmoqlardagi tuhmat va haqoratlarga asos bo‘layotgan manbalar shubhali va noqonuniy bo‘lib, bu holatga huquqiy baho beriladi. Ayni paytda ushbu asossiz ma’lumotlarni tarqatganlar va jamoatchilik ongida noto‘g‘ri fikr uyg‘otishga uringan shaxslar yuzasidan tegishli huquqni muhofaza qiluvchi organlarga murojaat qilindi. Qonunga muvofiq ravishda ularga nisbatan jazo choralari qo‘llaniladi.
Hokimlik jamoatchilikdan faqat rasmiy va ishonchli manbalarga tayanishni, ig‘vogarona ma’lumotlarga uchmaslikni so‘radi.
2023-yilning aprelida Andijon viloyati hokimligi Shuhrat Abdurahmonov haqida tarqalgan xabarlar yuzasidan bayonot berib, prokuratura organlariga shikoyat arizasi yuborilganini ma’lum qilgandi. O‘shanda internetda viloyat hokimi aks etgani iddao qilingan video tarqalishi ortidan, ijtimoiy tarmoqlardagi ayrim sahifalarda hokimning shaʼni va qadr-qimmatini kamsituvchi hamda obro‘sizlantiruvchi haqoratomuz postlar eʼlon qilingandi.
Izoh (0)