Агар Конгресс қарз олиш чегарасини кўтармаса, Қўшма Штатлар август ойидаёқ давлат қарзи бўйича дефолтга дуч келиши мумкин.
Бу ҳақда АҚШ молия вазири Скотт Бессентнинг қонун чиқарувчи орган раҳбарларига йўллаган мактубида айтилади.
Унинг сўзларига кўра, ҳукуматнинг нақд пул захиралари август ойида Конгресс танаффусга чиққан вақтда тугайди. Шу сабабли молия вазири қонунчиларни “АҚШнинг тўлиқ ишончи ва кредитини сақлаб қолиш учун” июль ойи ўрталарига қадар қарз лимитини ошириш ёки тўхтатиб туришга чақирди.
Акс ҳолда, август ойигача мамлакат 36,2 триллион доллардан ошган қарзларини тўлаш учун маблағ етишмай қолиши мумкин.
Апрель ойида АҚШ молия вазири Скотт Бессент Қўшма Штатлар дефолтга яқинлашаётгани ҳақидаги даъволарни рад этганди.
“Одамлар АҚШдаги вазият назоратдан чиқиб кетган, АҚШ дефолт томон кетмоқда, деб айтмоқда. Бу гаплар ҳақиқатга тўғри келмайди”, деганди вазир.
Таҳлилчилар фикрига кўра, АҚШ ҳукумати қарзи бўйича дефолт июль ўрталари ва октябрь ойи бошлари орасида содир бўлиши мумкин. Конгресс қарз лимитини ошириш ёки тўхтатиб қўйиш бўйича чора кўрмаса, июль ойи ўрталарига қадар АҚШда ҳисоб-китобларни тўлаш учун нақд пул етишмай қолиши мумкин.
Изоҳ (0)