Лондоннинг “Арсенал” клуби Чемпионлар Лигаси ярим финалида мағлуб бўлиб, мусобақа билан хайрлашди. Бу натижа орқали улар ўзи қатнашган кубок мусобақаларининг ярим финал босқичида мағлубиятга учраш орқали ўзига хос антирекорд қайд этмоқда. Бу ҳақда статистик маълумотлари билан машҳур Opta Спорт портали хабар бермоқда.
Бунгача “Арсенал” 2021/2022 ва 2024/2025 йилги мавсумларда Англия Кубоги ярим финалида ҳам имкониятни бой берган. Шунингдек, клуб 2020/2021 йилги мавсумда УЕФА Европа Лигаси ярим финали босқичида ҳам мағлубиятга учраган. Ҳали ҳеч қайси клуб мазкур босқичда бундай узоқ муддатли мағлубиятли серия қайд этмаган.
Маълумот учун, “тўпчилар” жорий мавсумги УЕФА Чемпионлар Лигаси ярим финал босқичида “ПСЖ”га қарши икки ўйинда ҳам мағлуб бўлди. “Канонирлар” Париж клубига умумий 1:3 (биринчи ўйин – 0:1, жавоб учрашуви – 1:2) ҳисобида имкониятни бой берди.
Эслатиб ўтамиз, Англия Премьер Лигасининг 35-туридан кейин “Арсенал” мусобақа жадвалида 2-ўринни эгаллаб турибди. Лондонликлар бу мавсум ҳам чемпион бўлиш имкониятини қўлдан чиқарди.
УЕФА Чемпионлар Лигаси финал учрашуви 31 май куни Германияда бўлиб ўтади. Унда “ПСЖ” ва “Интер” клублари тўқнаш келади. Учрашув 00:00 да (Тошкент вақти билан) бошланади.
Изоҳ (0)