ИШИД Европа Чемпионлар Лигаси ўйинларида терактлар уюштириш режасини маълум қилган.
Террорчилик ташкилоти хабарида қуролланган одам ва шу ҳафта Чемпионлар Лигаси ўйинларига мезбонлик қилувчи стадионлар — “Эмирейтс”, “Парк де Пренс”, “Метрополитано” ва “Сантяго Бернабеу” номлари ёзилган сурат илова қилинган. Шунингдек, суратда “Уларнинг барчасини ўлдириш лозим” деган ёзув ҳам мавжуд.
Чемпионлар Лигаси чорак финалида “Реал” “Манчестер Сити”га қарши, “ПСЖ” эса “Барселона”га қарши майдонга тушади. “Арсенал” ўзида “Бавария”ни қабул қилса, яна бир ўйинда “Атлетико” “Боруссия”га қарши баҳс олиб боради.
Marca хабарига кўра, хавфсизлик идоралари аллақачон “Реал”ни ИШИД таҳдиди ҳақида огоҳлантирган. Айни дамда учрашувни ташкиллаштириш борасида ҳеч нарса ўзгармаган — кучайтирилган хавфсизлик чоралари аллақачон кўрилган, Испания ички ишлар вазирлиги ушбу ўйинни “юқори хавф” тоифасига киритган.
Испания ҳукумати сешанба тонгида йиғилиш ўтказиб, қўшимча хавфсизлик чораларини жорий этиш борасида қарор қабул қилди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)