Ҳар бир футбол клубининг “кушандаси”га айланган футболчилар бор. Масалан, Дидье Дрогба “Арсенал”, Ҳарри Кейн “Лестер”, Луис Суарес эса “Норвич”га гол уришни яхши уддалаган. Худди шу моделни Чемпионлар Лигасида ҳам қўллаш мумкин.
Ушбу саҳифада Европанинг энг нуфузли клуб турнирида иштирокини давом эттираётган жамоалар қайси футболчилардан энг кўп жабр кўргани ҳақидаги статистика тақдим этилади. Кутилганидек, бу рўйхатда Лионель Месси, Криштиану Роналду, Карим Бензема ва Роберт Левандовски мавжуд, бироқ сиз кутмаган айрим номлар ҳам йўқ эмас. Қуйида бу ҳақида батафсил:
“Бенфика”
Кушанда: Роберт Левандовски
Голлар: 7
Польшалик футболчи португал клубига қарши олти бор тўқнаш келиб, уларда еттита тўп киритган. Дастлабки икки ўйинда Роберт рақиб дарвозасига йўл топа олмаган бўлса, кейинги баҳсларда “Бенфика”га осон бўлмаган, хусусан, Левандовски ҳет-трик қайд этган ЕЧЛ ўтган мавсуми гуруҳ босқичи ўйинида.
“Боруссия Д”
Кушанда: Криштиану Роналду
Голлар: 7
Сўнгги иккита трансфер ойнасида Роналду “Бавария”га ўтиши мумкинлиги ҳақидаги хабарлар янгради. Бироқ Криштиану Европани тарк этиб, Саудия Арабистонига ўтгани кўплар қатори Дортмунд жамоаси мухлислари учун ҳам ёқимли янгилик бўлди. Чемпионлар Лигасининг энг яхши тўпурари бу рўйхатда бир неча бор учраши табиий ҳол ва “Боруссия” ҳам ўша жабрдийдалар қаторида.
“Челси”
Кушанда: Карим Бензема
Голлар: 5
“Кўклар”га қарши тўртта ўйинда бешта гол. 2020/21 йилги мавсум ярим финалида Бензема лондонликлар дарвозасини бир марта ишғол қилган, бироқ бу “Реал”га финал йўлланмасини тақдим этолмаганди. Кейинги мавсумда эса “Олтин тўп”соҳиби қасос олишга муваффақ бўлди.
“Стемфорд Бриж”даги ўйин Каримнинг бенефисига айланганди: ҳет-трик. Жавоб ўйинида эса Бенземанинг қўшимча бўлимлардаги голи мадридликларга кейинги босқич йўлланмасини тақдим этади.
“Брюгге”
Кушанда: Риёд Маҳрез
Голлар: 6
Англияда фурор кўтариб чемпионликни қўлга киритган “Лестер” Чемпионлар Лигасининг келаси мавсумида мураккаб бўлмаган гуруҳдан жой олади ва аутсайдер “Брюгге”ни икки бор таслим этади. Маҳрез эса сафарда иккита, уй ўйинида битта гол уради. Худди шу ишни жазоирлик футболчи мусобақа гуруҳ босқичининг жорий мавсумида ҳам амалга оширди. Фақат “Манчестер Сити” сафида.
“Айнтрахт Ф”
Кушанда: Сон Ҳён Мин
Голлар: 2
Чемпионлар Лигаси дебютанти дастлабки иштирокдаёқ плей-офф йўлланмасига эга чиқди. Жанубий кореялик футболчидан ташқари ҳали ҳеч ким немис клуби дарвозасига биттадан ортиқ тўп киритгани йўқ.
“Бавария”
Кушанда: Криштиану Роналду
Голлар: 9
Роналдудан жабр чеккан яна бир немис клуби. Шубҳасиз “Бавария” ҳам юқорида қайд этилган лигадоши сингари Роналдунинг бошқа минтақага кетганини мамнуният билан қабул қилди. Португалиялик тўпурарнинг йўлига ҳатто Мануэль Нойер ҳам тўғоноқ бўлолмаганди.
Роналду “Бавария”га барча голларини “Реал” сафида урган, хусусан, тўпларнинг 5 таси 2016/17 йилги мавсум чорак финалида киритилган: биринчи ўйинда дубль, иккинчи баҳсда ҳет-трик. Ўшанда “қаймоқранглилар” икки ўйин натижасига кўп 6:3 ҳисобини қайд этганди.
“Порту”
Кушанда: Садио Мане / Роберто Фирмино / Муҳаммад Салоҳ
Голлар: 5
“Порту” “Ливерпуль”нинг фантастик триосидан энг кўп жабр кўрган клуб ҳисобланади — умумий миқдорда 15 та гол. 2017/18 йилги мавсумда “қизиллар” португал клубини меҳмонда 5:0 ҳисобида таслим этади, 2018/19 йилги мавсумда “Драгау”даги ўйин 1:4 ҳисобида инглизларнинг фойдасига ҳал бўлади. 2021/22 йилги мавсумда эса Портудаги ўйинда “Ливерпуль” 5:1 ҳисобида ғалаба қозонади. “Порту” мухлисларининг ҳолатига ҳавас қилиб бўлмайди.
“Интер”
Кушанда: Андрей Шевченко / Клаудио Писарро
Голлар: 4
А Сериядаги голлари камлик қилгандек, Шевченко Чемпионлар Лигасида ҳам “нерадзурри”ни таъқиб қилган. Украиналик футболчи умумий миқдорда “Интер”га 15 та гол урган, уларнинг 14 таси “Дерби делла Madoннина”да қайд этилган бўлса, яна бири “Динамо К” сафида киритилган. Ушбу голларнинг 4 таси Чемпионлар Лигасида урилган. Клаудио Писарро “Бавария” сафида бир бор, “Вердер” таркибида эса уч марта “Интер”га тўп киритган.
“Ливерпуль”
Кушанда: Карим Бензема
Голлар: 6
“Энфилд” ишқибозлари 21 февраль оқшомидаги “қонли ўйин”ни узоқ вақт унутмайдиган бўлди. Бензема бу ўйиндаги дубли орқали Дидье Дрогба (4) ва Винисиус Жуниорни (5) ортда қолдирди. “Сантяго Бернабеу”да ўйин борлигини инобатга олсак, бу статистика ўзгариши мумкин.
“Манчестер Сити”
Кушанда: Лионель Месси
Голлар: 7
Гвардиола келгунга қадар аргентиналик футболчи икки бор “шаҳарликлар” дарвозасига йўл топган. Пеп даврида эса беш марта “Манчестер Сити” мухлисларини ранжитди, хусусан, 2016/17 йилги мавсумда “Камп Ноу”да ҳет-трик этди, ўтган мавсум эса “ПСЖ” сафида гол урди.
“Милан”
Кушанда: Лионель Месси
Голлар: 8
“Манчестер Сити” мухлислари енгил торца ҳам бўлади. Месси А Серия гранди дарвозасини нақ 8 бор ишғол қилган.
“Наполи”
Кушанда: Эрлинг Ҳоланд / Марио Гомес
Голлар: 3
Бир неча йилдан кейин Ҳоланд номи бу рўйхатда кўпроқ учраши табиий. Норвегиялик футболчи шу вақтга қадар “Наполи”га уч бор тўп киритган. “Бавария” собиқ форварди Марио Гомес эса бу кўрсаткични бир ўйиндаёқ қайд этиб қўйган.
“ПСЖ”
Кушанда: Карим Бензема
Голлар: 5
Париж клубига дастлабки голини 2006 йилда урган франциялик футболчи кейинги йиллар давомида яна тўрт бор “ПСЖ” дарвозасига йўл топди. Ўтган йилги жавоб ўйинида Бензема томонидан ижро этилган ҳет-трик Мадридга кейинги босқич эшикларини очганди.
“Лейпциг”
Кушанда: Ирфан Жан Қаҳвечи / Маркус Рэшфорд
Голлар: 3
Туркиялик футболчи Чемпионлар Лигасида бор-йўғи учта гол урган ва уларнинг барчаси “Лейпциг” дарвозасига битта ўйинда киритилган. Бахтга қарши ўша учрашувда “Истанбул Башакшеҳир” 3:4 ҳисобида ютқазиб қўйган. Рэшфорд ҳам бир ўйиндаги ҳет-трик орқали “буқалар”нинг кушандасига айланган.
“Реал Мадрид”
Кушанда: Роберт Левандовски
Голлар: 6
Бу рўйхатда “Реал”га қарши турадиган ўйинчи ўзига хос бўлиши аниқ эди, албатта. Ҳа, бу голларнинг тўрттаси 2012/13 йилги мавсум ярим финалидан ўрин олган ўша машҳур “Боруссия Д” — “Реал” учрашувида (4:1) киритилган. Энди полшалик футболчи Еврокубоклардаги бу ҳаракатларини Испания майдонларида такрорлашга уринмоқда.
“Тоттенҳэм”
Кушанда: Криштиану Роналду / Серж Гнабри
Голлар: 4
Бу рўйхатда Роналдунинг бўлиши “шпорлар” учун уятли ҳолат эмас, бироқ собиқ “канонир” ҳақида бундай деб бўлмайди. “Тоттенҳэм” мухлислари учун даҳшатли кечада Гнабри покер қайд этган, ўйин эса 7:2 ҳисобида “Бавария” ҳисобига ҳал бўлганди.
Изоҳ (0)